“Ida ne'e konferénsia dahuluk tanba primeira vez mak JF organiza rasik nia Konferénsia Nasionál ne’ebé mak hahú husi nivél Postu Administrativu no nivél Munisípiu”, dehan Sekretáriu Jerál JF, Abrão Saldanha ‘Nokosiku’ iha CCD, Merkadu Lama, Kaikolis, sesta (18/02).

Organizasaun Juventude Fretilin ne'ebé inisia husi Sekretáriu Jerál FRETILIN, Mari Bim Amude Alkatiri no Prezidente Partidu FRETILIN, Francisco Guterres ‘Lú Olo’ durante ne’e la'o no buras dadaun ona.

Nune'e husu delegadu na'in-661 husi nível postu iha munisípiu 12 no Rejiaun Administrativa Espesiál Oekussi Ambeno (RAEOA) atu tau atensaun hametin liután JF nia maturidade polítika atu trata adversáriu ho dignu, la'ós inimigu atubele atrai joven sira adere mai JF.

Tanba buat ne'ebé FRETILIN opta mak koletivizmu no durante funu ba libertasaun nasionál lidér FRETILIN nian barak mak mate, maibé luta ne'e kontinua, to'o hetan independénsia no la depende ba figura ida.

Sekretáriu Jerál Partidu FRETILIN, Mari Bim Amude Alkatiri hatete maske instituisaun ka grupu Juventude FRETILIN nia idade komesa boot no adultu ona, maibé labele hanoin katak ne'e tasak ona.

Tanba ne’e, presiza atu haki'ak liután instituisaun ida ne'e atu kontinua buras tanba adversáriu sira balun agora komesa nakdoko ona bainhira JF hahú buras dadaun.

Husu mós ba JF atu sai forte liután servisu maka'as iha bazé hodi lori vitória ba kandidatu Prezidente Repúblika, Francisco Guterres ‘Lú Olo’, ba periódu 2022-2027. (*)