Tanba ne’e, UNTL hamutuk ho F-KOVANA realiza Semináriu Reflesaun ho téma reflesaun nasionál ho esperitu rekonsiliasaun hodi konvida lider sira atubele fahe hanoin oinsá hatun tensaun polítika iha eleisaun Prezidensiál.

“Ita-nia Prezidente Repúblika kompremete atu ba halo abertura, sei konvida Mari Alkatiri, Maun Boot Xanana Gusmão, Ramos Horta, José Lobato, José Luis Guterres ho líder sira seluk tan, ne'ebé mak envolve iha funu ne'e mai to'o rohan e neste momentu sira ladun ko'alia ba malu, e ami tenta karik bele antes sira atu ba eleisaun sira bele tur hamutuk, sira la tur hamutuk mós nu minimu fahe netik sira-nia opiniaun oinsá, sira bele hakalma situasaun ne'e no ita bele halo eleisaun Prezidensiál ne'ebé ho di'ak, la'ós apenas ida ne'e atubele kuda valór rekonsiliasaun ba ita-nia sosiedade, ida ne'e mak importante”, dehan Magnifiku Reitór UNTL, João Soares Martins, hafoin hasoru ho PR Lú Olo iha Palasíu Prezidensiál Bairopite, kuarta (16/02).

Ba semináriu ne’e, Prezidente Repúblika (PR), Francisco Guterres ‘Lú Olo’, rasik iha disponibilidade halo abertura ba Reflesaun ho téma reflesaun nasionál ho esperitu rekonsiliasaun, ne'ebé realiza husi UNTLF-KOVANA iha loron 24 fulan-fevereiru 2022.

“Ohin ami mai hasoru ho Prezidente Repúblika atu konvida Xefe Estadu ba loke semináriu ne'ebé Universidade Nasionál Timor Lorosa'e (UNTL) ho Forum Komunikasaun Valores Nasionál (F-KOVANA) organiza hamutuk halo iha loron 24 ho téma sentrál reflesaun nasionál ho espiritu rekonsiliasaun”, informa nia.

Ba semináriu ne'ebé realiza, iha tempu eleisaun prezidensiál ho tensaun polítika as, tanba ne'e tenta atubele hamenus tensaun ne'e, konvida líder polítiku sira hotu, liliu líder nasionál sira.

Prezidente Konsellu Ezekutivu ba Forum Komunikasaun Valores Nasaun (F-KOVANA), Eladio Antonio Faculto hatete, nasaun presiza líder sira atu fila oin ba malu, ko'alia ba malu, problema Timor problema ema hotu nian.

Ho problema hirus malu, fila kotuk ba malu ne'e la’ós diverjensia, maibé problema sira agora boot sira sempre fila kotuk ba malu, bainhira hirus malu oituan hirus malu tinan ba tinan, ema barak sente ida ne'e ladún di'ak.

“Ita-nia povu la gosta buat ida ita hirus malu oituan dehan diferénsia de'it idea, fila kotuk ba malu, nunka mais ko'alia ba malu, ne'e la ajuda Timor ninia dezenvolvimentu ba oin. Ita bele iha diferénsia maibé tenke tur hamutuk ko'alia nafatin, se oin ba malu nafatin”, afirma nia.

Tanba ne'e, líder nasionál sira-nia obra, luta ne'ebé tinan barak hodi lori hothotu hamutuk ba ukun-an, ikus mai komportamentu públika, komunikasaun polítika iha públika ladún di'ak, ema hotu sente la di'ak, hirus malu oituan sira fila kotuk ba malu.

Nune’e, F-KOVANA hamutuk ho UNTL tenta promove halo reflesaun nasionál ida kona-ba situasaun polítika, ambiente komunikasaun iha Timor-Leste, oinsá bele di'ak fali, hanoin rekonsiliasaun hanesan parte ida importante solusiona problema.

Enkuantu, komunikasaun ba líder sira atu partisipa semináriu ne'e, UNTL ho F-KOVANA distribui ona konvite, halo kontaktu ona hein resposta husi oradór sira, husi entidade importante sira, atubele hola parte iha reflesaun nasionál ne'e. (*)