“Orsida mai sei reuniaun fali iha Ministériu laran, liliu ita-nia Diresaun Jerál Assuntu Bilaterál sei halo nota diplomasia ba Austrália, la'ós ba Austrália de'it maibé ba iha Inglaterra, Korea no Portugál”, dehan Julião ba Jornalista sira iha Palásiu Governu, kuarta (16/02).
Husi karta diplomasia ne'ebé sei haruka ba nasaun haat ne’e, atu hatene nasaun ida nia implementasaun serka sanitária no Konfinamentu Obrigatóriu, tanba Governu Timor-Leste hakarak sidadaun hothotu iha estranjeiru ezerse nia direitu atu tuir votasaun iha Eleisaun prezidensiál ne'ebé sei realiza iha 19 fulan-marsu tinan 2022.
“Ita-nia hakarak sidadaun sira iha estranjeiru tenke vota, ne'e ita-nia hakarak, maibé ema nia regra, depende ba ita-nia nota de entendimentu, depois mak ita manda ba, atu oinsá mak fó disponivel ba ita-nia sidadaun sira, karik iha rekézitu ruma ne'ebé priense atu ita-nia sidadaun sira kumpri atu sira bele ba sentru votasaun”, nia afirma.
Karta Diplomasia ne'e seidauk iha rezultadu maibé dadaun ne'e MNEK prepara ona hodi fasilita sidadaun iha estranjeiru atu ezerse sira-nia direitu iha sentru votasaun. (*)