“Bainhira povu fó fi'ar ba partidu CNRT liliu pesoál maun boot Kay Rala Xanana Gusmão hodi tutela pasta Premeiru Ministru mak ami grupu Amigu JB propoin, dada kadoras mai Timor-Leste hodi fó servisu ba povu Timor-Leste”, dehan Responsável Másimu Grupu Amigu JB Funulitik, Carolino de Oliveira iha Sede Ekipa Susesu Kandidatu José Ramos Horta, Hudi Laran, sábadu, (12/02).

Nune'e mós loke kampu traballu ba joven sira, no tau orsamentu ne'ebé dignu ba setór edukasaun, hadi'a fasilidade saúde, inklui dada bee-moos ba komunidade.

Ba eleisaun parlamentár ne'ebé mak sei monu iha tinan 2023, Grupu Amigu JB Funu Litik iha komitmentu atu kontinua fó apoiu no lori vitória ba Partidu CNRT liliu pesoál Kay Rala Xanana Gusmão hodi sai Premeiru Ministru períodu 2023-2028.

Reprezentante Inan-Aman, Alfonço Ximenes da Silva hatete, nia parte envolve iha Grupu Amigu JB atu reprezenta inan-aman, hodi hatudu komitmentu apoiu líder na'in-rua Kay Rala Xanana Gusmão ho José Ramos Horta atu oinsá kria kampu traballu ba joven sira ne'ebé doku ona sapeo metan.

“Ida ne'e mak ha'u aumenta tanba ha'u mós nu’udar ema profesór ida, ha'u hanoin tanba joven agora barak doku sapeo metan ba laiha servisu, hanesn de'it”, hatete nia.

Ba kampu traballu ne'ebé sei mínimu, mak fó dalan ba joven sira oho malu, no dala barak ema haree joven baku malu, tanba joven sira iha sentimentu maka’as bainhira doku sapeo metan laiha empregu ba sira.

Ho ida ne'e husu ba inan-aman buka líder na'in-rua, Xanana ho Horta hodi oinsá buka solusaun hodi bele loke kampu traballu ba joven sira ne’ebé durante ne’e sai dezempregu.

“Tenke haree ba joven sira sentimentu barak, doku sapeo ba dudu fali gerobak, ne'e ita hanoin barak loos tanba saida ami orang tua, ha'u mós termasuk ha'u-nia oan ida eskola hotu servisu laiha, ha'u duni tiha nia ba Inglatrera, iha ne'e mós servisu laiha”, afirma nia. (*)