Tuir informasaun ne’ebé www.tempotimor.com, asesu husi mídia PM, kinta (21/09/2023) katak, diskusaun klean ba asuntu greater sanrinse ne’e rasik, Governu Timor-Leste no Governu Austrália sei haklean iha fulan-juñu tinan 2024.

Reprezentante Spesiál Governu Austrália ba Negosiasaun no Dezenvolvimentu Greater Sunrise, Steve Bracks informa, asuntu ne’e durante hala’o enkontru ho Primeiru-Ministru, Kay Rala Xanana Gusmão iha Palásiu Governu ko’alia kona-ba greater sunrise.

“Austrália rekoñese projetu Greater Sunrise importante tebes ba povu no família Timor-Leste hotu. Austrália iha kompromisu servisu ho Timor-Leste oinsá mak atu dezenvolve projetu (Greater Sunrise) ne’e ba oin iha meneira ne’ebé mak teknikavel viavel no komersialmente ba projetuj ida-ne’e”, informa Steve Bracks.

Steve Bracks nu’udar amigu di’ak Timor-Leste nian ne'ebé uluk fó apoiu maka’as ba Timor nia luta ba soberania fronteira marítima ho Austrália ne’ebé servisu hamutuk ho Advogadu Timor-Leste, Bernard Colaery no Harold Mitchell durante ne’e hala’o ona vizita mai Timor-Leste ba dala haat ona.

Entretantu, foin lalais ne’e iha Jakarta-Indonézia, Primeiru Ministru, Kay Rala Xanana Gusmão hala’o enkontru bilaterál Primeiru-Ministru Austrália, Anthony Albanese diskute kooperasaun rai rua nian.

Iha enkontru amizade ne’e, Xefe Governu rua ko’alia ho hamnasa ba malu sei hapara diverjénsia hothotu iha pasadu, atu nune’e povu rua, Australianu no Timoroan, bele haree futuru relasoins iha konfiansa boot no respeitu mútuu ne’ebé boot liu. (*)