“Iha Timor ha'u seidauk hetan autoridade ida ne'ebé iha kapasidade hanesan ne'e, ha'u seidauk haree governante sira ne'ebé iha kapasidade atu traduz poder ne'ebé iha nu'udar oportunidade atu servi ema seluk, laiha, seidauk iha, nem Prezidente fali, nem Primeiru Ministru fali laiha, iha tempu kampaña sira halo promesa oioin, maibé hetan tiha pozisaun la halo hanesan ne'e”, dehan Pe. Aquile iha nia omilia ba sarani sira iha igreja kapela Tasitolu, Masinlidun, domingu (13/02).
Ba autoridade sira iha imi-nia lideransa nu'udar autoridade buka atu banati tuir jesus nian, jesus ninia definisaun ba lideransa nian mak ne'e, ema ne'ebé iha kapasidade atu traduz, ninia poder ne'ebé iha nu'udar oportunidade atu servi ema seluk.
“Ne'e duni autoridade tenke iha papel, buka atu traduz poder ne'ebé nia iha nu'udar oportunidade atu servi ema seluk, servi povu sira, ne'e mak autoridade lolos, ida ne'e mak jesus hanorin mai ita, deklara Padre ne’e.
Nune'e mós iha eskola profesór sira mós tenke hatene fahe tempu ho estudante sira, prepara lisaun molok ba hanorin, akompaña estudante ida-idak sira la mai eskola karik buka tuir, hodi hatete razaun estudante la prezensa.
“Tanba jesus hakarak ita atu loke matan, loke tilun, jesus hakarak ita atu fahe buat ne'ebé ita iha ho fuan, nia hanorin ita atu dezenvolve ita-nia vida sosiál, hanorin ita atu akompaña malu hasoru ita-nia objetividade ba reinu lalehan, hakarak ita atu ajuda malu”, afirma nia. (*)