“Ha’u hanoin be ema hothotu iha direitu ba kandidata-an tanba ne’e sei vota ka la’e ha’u hanoin ne’e rahasia (segredu) depois iha urna nia oin mak foin hatene vota ba se”, dehan PM Taur Matan Ruak, iha palásiu Prezideensiál Bairopite, kinta (03/02).

Tanba Ekipa Susesu lori Kandidatura Isabel Ferreira ba rejista iha Tribunál Rekursu, loron 28 janeiru 2022 ho kandidatu independete ho dokumentu ne’ebé aprezenta husi apoiante hamutuk rihun-neen (6.000).

Antes ne’e, Terseira (III) Vise Prezidente Partidu Libertasaun Popular (PLP), Maria Angelina Sarmento deklara, Partidu Libertasaun Popular seidauk deklara kandidata Isabel da Costa Ferreira ba Prezidente Repúblika (PR) iha períodu tinan 2022-2027 tanba desizaun iha kongressu partidu.

“Ida ne'e ha’u mós seidauk bele pronunsia iha ne'e”, dehan nia iha Parlamentu Nasionál (PN), kuarta (08/09).

PLP rasik seidauk realiza kongressu atu deside, maibé felismente kandidatura individu ne’ebé hakarak kandidata-an ne'e konstituisaun fó dalan.

“Mais desizaun partidu atu fó apoiu ba sé, to'o agora partidu seiduak hola desizaun ruma ba ida ne'e”, hatete nia.

Tanba ne'e, seidauk tempu atu pronunsia rezultadu ida ne'e, maibé hein de'it kongressu mak sei foti desizaun tanba kongressu mak fatin ne’ebé atu hola desizaun partidu nia lala'ok ba futuru.

Tuir lolos despaisu husi Prezidente Partidu Libertasaun Popular, atu hala'o kongressu iha fulan-otubru tinan (2021) ne'e, maibé ho regra Serka Sanitária no konfinamentu obrigatóriu, ajenda ba kongressu nian adia fali ba data indeterminadu.

“Se mak sei deside data ida ne'e, orsida define iha partidu nia estatutu”, esplika nia. (*)