Sekretária Jerál Adjunta FRETILIN, Cipriana da Costa Pereira hatete, FRETILIN sei anúnsia nia figura ida ba kandidata preZidente, hafoin PreZidente Repúblika (PR), Francisco Guterres 'Lú Olo' dekreta ona loron ba eleisaun Prezidensiál.

"Kestaun kandidatu depois prezidente fiksa tiha mak kandidatu sé mak atu avansa, konserteza ke FRETILIN bele iha nia referénsia balun atu fó apoiu, depois prezidente dekreta data ba eleisaun e bele aprezente kandidadu sé, maibé la'ós iha fatin ida ne'e", dehan nia hafoin hasoru malu ho PR Lú Olo iha Palasíu Prezidensiál Bairopite, kinta (06/01).

Nune’e partidu FRETILIN seidauk iha momentu ida atu ko'alia ida ne'e, tanba prezidente seidauk fiksa hela data atu marka ba eleisaun prezidente nian.

Iha fatin hanesan, Vise Prezidente Interinu partidu Frente Mundansa (FM), Eugido de Jesus hatete, Partidu Frente Mudansa seidauk deside kandidatu, tanba sei hein Prezidente Repúblika dekreta loron eleisaun.

"Ami iha esperénsia ho prosesu dala rua, ha'u mós ohin aprezenta ba na’i prezidente, uluk ami-nia eis prezidente Dr. Lugu ba dala rua ami gagal tiha", dehan nia. 

Enkuantu Frente Mundansa sei reuniun fali ho diresaun nasionál to'o baze para konferánsia nasionál ida, bainhira prezidente dekreta ona loron, nune'e mak sira sei hili fali figura ruma hodi kandidata. 

Antes ne'e, Prezidente Repúblika (PR), Francisco Guterres 'Lú Olo' deklara, nia parte prontu rekandidatu-an ba Prezidente Repúblika iha períodu 2022-2027 se povu tomak fó konviansa ba nia.

"Prezidente prontu atu kandidatu, se bainhira povu tomak ne'e hakarak atu prezidente ne'e atu kandidatu filafali, ne'e ha’u hakarak dahan hanesan ne'e", dehan Lú Olo hafoin partisipa selebrasaun 12 novembru iha Santa Cruz, sesta (12/11). (*)