Prezidente Parlamentu Nasionál (PN), Aniceto Longuinhos Guterres Lopes hatete, submete ona diploma Orsamentu Jerál Estadu (OJE) 2022 ba Prezidente Repúblika (PR) Francisco Guterres ‘Lú-Olo’ ho prazu durante loron 30 hahú husi loron 20 dezembru 2021 to’o 19 janeiro 2022.
“Proposta OJE 2022, ha’u haruka ona ba Prezidente Repúblika, tuir kompeténsia Xefe Estadu nian, ho prazu loron 30 atu promulga ou veta”, dehan Aniceto iha Parlamentu Nasional, segunda (20/12).
Iha loron 16 fulan-dezembru Parlamentu Nasionál deside aprova proposta-lei númeru 35/V(4a) OJE 2022 iha finál global ho votu a-favór 44, kontra 21 no abstensaun laiha.
Purtantu tetu OJE 2022 ne’ebé Governu submete ba PN iha loron 15 fulan-outubru tinan 2021 ne'e, ho montante hamutuk billaun US$1,675.
Maibé, durante debate espesialidade iha plenária, deputadu sira aprezenta tan proposta adisionál hodi aumenta OJE husi billaun US$1.6 ba billaun US$2.176. (*)
