"Deskulpa ida ne'e laiha, ne'e ha'u husu deskulpa,  Prezidente Repúblika bolu duni mais ami to'o iha ne'eba dehan prezidente Ramos Horta sai ba reuniaun, maibé to'o oras ne'e ha'u la rona”, dehan Afonso Gomes nu'udar aman ba saudozu Sebastião Gomes ho oin triste iha selebrasaun 12 Novembru iha Santa Cruz, sesta (12/11).

Hahú Sebastião mate to'o agora seidauk iha Estadu Timor-Leste ko'alia kona-ba saudozu ninia sakrifisiu no apoiu ruma hanesan halo uma no buat seluk tan ba nia aman-inan ne'ebé sei moris.

"Ha'u sente hanesan buat ida dehan, ha'u-nia oan ne'e hanesan osan mean, lakon ha'u triste. Ha'u-nia oan ne'e mate ema hotu moris di'ak", dehan nia ho matan ween.

Prezidente Repúblika, Francisco Guterres 'Lú Olo' hatete, Estadu tenke haree nafatin tau matan nafatin ba sira, ba ferik no katuas sira.

"Kona-ba Sebastião nia inan-aman ne'ebé sei moris hela partikularmente ba sira ha'u hanoin katak justu liu prontu Estadu bele tau matan ba sira", dehan PR Lú Olo. 

Nune'e Prezidente Komite 12 Novembru, Grigório Saldanha hatuatan, Estadu la taka matan, komite mós esforsu beibeik no tenta depois de komemorasaun sei foku ida ne'e.

"Katuas sebastião Gomes nia pai ho mãe ami sei foku hanesan prioridade ami sei haree depois 12 novembru liu", dehan nia. (*)