“Se ita hare katak fulan hirak ne’e governu la konsege halo nia serbisu, la’o ba – la’o mai halo fali kampaña. Ha’u rona, ha’u fulan 6 iha liur, ha’u lahatene. Ha’u rona katak la’o ba – la’o mai insulta Xanana mak koruptor, ida ne’e governu saida mak ida ne’e,” hatete Xanana bainhira hasoru malu ho grupu joventude no arte marsiais sira iha salaun katedral Dili, Sabádu (24 /03). 

Xanana mós esplika katak, tanba saida mak ba eleisaun antisipada, tanba goveru labele ukun. Governu agora labele ukun. Governu parte ai – rin Estadu nian. 

“Tanba governu laiha kbiit atu ukun, tanba ida ne’e mak ita ohin ko’alia dehan atu hadia Estadu hodi fó kbi’it ba governu foun ne’ebé bele ka’er ukun. Se nune’e, rajaun ne’ebé lori ita boot sira mai hodi ita hasoru malu mak ida ne’e,” esplika Xanana. 

Situasaun politika Timor – Leste nian mós hanesan akontese iha España Beljika no iha Alemaña foin dadauk mak Canselir Angle Merkel konsege hetan maioria, Italia mós foin lalais halo eleisaun, hanesan hamaus malu. 

“Hanesan hotu, la’ós iha Timor – Leste de’it mak buat ne’e akontese, la’e. Iha rai seluk mós akontese. Tanba ne’e mak ita bolu dehan demokrásia. Tanba ne’e mak ita tur hamutuk hodi rezolve impase politiku. Ita la ba oin, la ba kotuk, la sorin. Ita mak nune’e hela de’it. Tanba ne’e mak prezidente kuandu nia hasai (desidi) eleisaun antisipada, ha’u iha liur. Ha’u hakerek ba nia, ha’u fó parabéns”. 

Tanba ida ne’e mak AMP ne’ebé iha dadauk ona koaligasaun ne’e oinsá iha difikuldade nia laran hodi intende konstituisaun, intende valor demokrásia ninian, intende lei, ita hotu tenke felisita, kongratula sira ne’ebé tur iha opozisaun iha parlamentu. Sira kumpri sira nia dever.

“Di’ak tebtebes mosu agora, se mosu ikus fali mai, ita sei tauk. Ha’u atu dehan de’it ba maluk sira tomak, ha’u peregrinasaun fulan 6 iha liur hasoru ema boot barak”. (Oki)