Tempotimor (Díli) – Ponte Bidau ne'ebé agora troka naran sai Ponte BJ Habibie, nu'udar onra ida ba eis Prezidente Indonézia, Baharudin Jusuf Habibie. Inklui mós nu'udar pasu dahuluk.
"Ha'u hanoin, ne'e hanesan faze simbolik ida, ba tan oin. Ne'e faze simbolizmu, faze simbolizmu ne'ebé boot. Maibé, espera katak iha futuru oin mai, iha tempu oin mai ita bele ko'alia asuntu barak liután," Ministru Reforma Lejislativa Asuntu Parlamentar (MRLAP), Fidelis Leite Magalhães hatete iha serimonia inagurasaun Ponte BJ Habibie, Kinta (29/08/19).
Karik liuhosi fó naran ba ponte ne'e, bele hafasil liután para bele hetan ruin husi saudozo Nicolau Lobato? “Ida ne'e nu'udar faze simbolizmu ida,” MRLAP hatete tan.
Saudozu Nicolau Lobato, nu'udar lider importante ida ba nasaun Timor-Leste ne'ebé lakon nia vida iha funu laran, bainhira defende povu no nasaun Timor-Leste.
Alende ne'e, atuál Primeiru Ministru Taur Matan Ruak ne'ebé uluk sei asume pasta hanesan Prezidente Repúblika deklara katak ruin saudozu Nicolau Lobato nian importante ba Governu no Estadu Timor-Leste.
"Ruin saudozo Nicolau Lobato, prioridade primeiru ba estadu Timor-Leste atu buka hetan, hafoin buka mós sira seluk," deklara Taur Matan Ruak iha Baucau, Kinta (25/09/2014).