"Ohin ita halo misa agradese ba loron Konsulta Populár nian, ba dala ruanulu. Ita tenke agradese ba Nai Maromak, tanba nia hamutuk ho nia povu to'o ohin loron. Entaun, signifika saida ba ita loron istóriku ida ne'e. Tanba ne'e, komemorasaun tinan 20 referendu labele sai memoria de'it. Maibé, Timoroan sira tenke kuda metin iha ida-idak nia fuan," hatete Bispo Díli, Dom Virgilio do Carmo da Silva iha nia reflesaun durante misa agrdesimentu ne'e.

Iha misa ne'ebé hala'o tuku 09.00 dadeersan ne'e, Dom Virgilio husu Timoroan hotu tenke buka Maromak nian prezensa hodi fó Gloria ba Nai Maromak. Liuliu iha loron Konsulta Populár ne'ebé Timor-leste atu komemora ba dala ruanulu iha loron 30 Agusto.

Governu Timor-Leste, liuhosi Komisaun Organizadora tinan 20 Konsulta Populár, Kinta (29/08/19) dadersan, oferese misa agradesimentu hodi komemora loron Konsulta Populár 30 Agusto iha Katedral Díli.