"Ohin reuniaun regular Prezidente Tribunál Rekursu ho Prezidente Repúblika hodi ha'u hato'o prosesu dezenvolvimentu ne'ebé la'o iha área justisa nian hanesan tribunais sira. Liu-liu prosesu sira ne'e la'o oinsá, la'o di'ak no lalais ka oinsá? Maneira oinsá mak prosesu sira ne'e bele la'o ho di'ak, mezmu iha prosesu balun ne'ebé sei pendente," hatete PTR Deolindo ba jornalista iha Palásiu Prezidensiál, Bairru-pite, Segunda (26/08/19).

Deolindo informa, atu halo prosesu iha área judisial la'o lalais tenke iha mudansa ba juis sira iha tribunál . "Liuliu juis sira primeira instansia, sira ne'e mak obriga para bele prosesu sira ne'ebé pendente ne'e la'o ho lalais di'ak liután," PTR ne'e tenik.

Nia dehan, mudansa ba juis primeira instansia sira ne'e sei akontese iha fulan Setembru nia laran. Bainhira servisu judisiariu la'o fali ona.

"Iha loron 16 Setembru ba oin, sei iha mudansa iha movimentasaun judisiál. Tanba, agora judisiariu feriadu hela. Maibé iha loron 16 setembru ba oin, iha mudansa ona. Mas, molok to'o iha ne'ebá, iha konsellu mós halo desizaun kona-ba fatin ba juis sira iha tribunál Munisípiu Díli, nia esplika.

Tuir PTR Deolindo, buat hirak ne'e konsellu hala'o tanba prosesu hirak ne'e kompleksu, la'ós iha nia kuintidade prosesu de'it. Maibé, kompleksu mós iha nia matéria. Tan ne'e, Deolindo dehan tenke koloka juis sira ne'ebé iha koñesimentu di'ak mak koloka iha Díli.