CNC halakon naran fotografu sira iha exhibisaun foto rezistensia Featured

Tempotimor (Dili) – Fotografer Timor oan sira ne’ebé hasai foto iha tempu rezistensia mai to’o ohin loron sente lamenta no triste tebes ba Centro Nacional CHEGA! (CNC) ne’ebé halakon autor fotografer sira nia (kréditu) durante eventu exhibisaun foto rezistensia nian iha Parlamentu Nasionál.

Eventu exhibisaun fotografia rezistensia ne’e organiza hosi CNC ho nia parseiru sira hanesan Konsellu Imprensa no seluk tan, maibé infelizmente autor fotografer sira nia kréditu ka sira nia naran la mosu iha fotografia sira ne’e. Ho kestaun ne’e, fotografer Timor oan sira hanesan Jornalista Fotografer ba ajensia notisioza REUTERS no António Dasiparu ne’ebé oras ne’e nu’udar jornalista fotografer ba European Pressphoto Agency (EPA) sente triste no lamenta tebes ho komisaun organizadora ba eventu ne’e, tanba laiha étika.

Jornalista Fotografer REUTERS, Fotografer Lirio da Fonseca ne’ebé mak kontribui foto balun iha eventu exhibisaun fotografia ne’e katak, nu’udar jornalista Timor oan ida, nia iha duni dever hodi kontribui ba eventu ne’e, maibé sente triste tebes, tanba nia naran la mosu iha foto sira ne’e bainhira CNC organiza hodi halo exhibisaun iha Parlamentu Nasionál.

“Ami iha dever ona sira husu depois ami kontribui, maibé depois taka iha ne’e ami hare kuaje hotu kedas, foto sira hotu kedas laiha credit ba foto sira ne’e, no hasai horbainhira, la esplika iha ne’e. Entaun, ida ne’e, ne’e la di’ak,” hatete Jornalista Lirio ba Jornalista sira iha Parlamentu Nasionál, Dili Segunda (26/08).

Jornalista Fotografer hosi Ponta Leste ne’e hatutan, sira nia ezijensia ne’e la’ós atu buka naran (popularidade), maibé ne’e nu’udar kestaun étika.

“La’ós ami hanesan fotografer ezije ida ne’e hanesan atu buka popularidade ka buat ruma, maibé la’e. Ida ne’e étika. Étika ida ne’ebé ema hotu kumpri, tanba ida organiza dadauk ne’e iha Konsellu Imprensa iha Centro Nacional Chega (CNC) ne’ebé tuir loloos hatene étika kona – bá ida ne’e,” esplika Lirio ho sente triste tebes.

“Se ita hakarak públika ida ne’e, ninia autor ne’e iha, no foto sira ne’e mai hosi ne’ebé,” nia esplika.

Expozisaun fotografu sira ne’e mós hakerek sala Mari Alkatiri nia naran ne’ebé hakerek fali Mari Alaktiri iha fotografu ida.

Lirio hatutan, CNC mak sosa fotografia sira ne’e, maibé to’o oras ne’e seidauk iha pagamentu ruma.

Nia hatuan credit ba foto sira ne’e nu’udar direitu profisional fotografu sira nian.

“Ida ne’e ha’u sente triste tebes, maibé ba eventu sira hanesan ne’e ha’u kontente, no sujere katak sala sira hanesan ne’e labele akontese tan,” hatutan Lirio.

Iha fatin hanesan, Prezidente Konsellu Imprensa Timor – Leste, Virgílio Guterres konsidera kestaun ne’e seidauk to’o iha nivel fallansu ida, tanba nia hare hanesan prosedimentu hosi komisaun organizadora rekoella fotografia sira ne’e.

“Konkorda katak étikamente fotografia tenke fó kréditu, maibé hare ba expozisaun ida ne’e, tanba iha fotografia barak iha painel ida, entaun ita atu tau ida – idak iha ne’eba, ha’u hanoin ba kestaun teknika ne’ebé ha’u hanoin komisaun organizadora lakonsege halo,” esplika Virgílio.

“Maibé buat ne’ebé ha’u hanoin no sujere ba komisaun organizadora atu ikus mai produz ne’e mak manual ida kona – bá exhibisaun tenke tau ona kréditu iha laran,” nia sujere.

Kona – bá kestaun ne’e mosu dezintendimentu itoan entre Jornalista Fotografu sira ho Diretór Ezekutivu Centro Nacional CHEGA!, Hugo Maria Fernandes, maibé nia promete katak sei hadia hikas foto sira ne’e hodi tau mós autor sira nia naran.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.