"Ami juventude sira husi Munisípiu Aileu, lakohi ona atu politiku sira uza ami hanesan objetu. Tan ne'e, Husu Dra. Isabel da Costa Ferreira atu Kandidata-an nu’udar independente ba Eleisaun Prezidente Repúblika ba períodu 2022-2027”, dehan koordenadór GJMA, Saturlino Sarmento da Costa, iha Restaurante Benifica, kinta (30/09).
Dadauk, públiku tomak hatene kada tinan lima, Timor-Leste selebra Festa Demokrasia hodi hala'o Eleisaun Prezidensiál. Bainhira besik eleisaun ona, politiku sira gosta aproveita juventude hodi transforma hanesan instrumentu no objetu ba sira-nia politika.
Tanba ne'e, juventude Munisípiu Aileu, deklara lakohi ona atu politiku sira uza sira hanesan objetu hodi atinje objetivu.
Dadaun Joven Aileu halibur hamutuk hanoin no hakarak no husu Isabel da Costa Ferreira ba kandidata-an ba Prezidente Repúblika hanesan independente idane 'ebé la halis ba Partidu seluk.
Ho desizaun joven nia hodi fó apoiu ba Espoza PM, tanba kaer ba filózofu Hegel dehan "Real Ne'e Ideal" entaun realidade hirak ne'ebé Isabel da Costa Ferreira iha dahuluk, nia hanesan ema ativista iha esperiénsia ne'ebé kle'an kona-ba moris nu’udar politika, nunka nakadoko tanba prinsípiu ne'ebé nia luta bebeik ona liliu ba problema povu nian.
"Iha sorin seluk nia mós ema ida ne'ebé iha kapasidade hodi bele tane metin rai ida ne'e hanesan akademista no esperiénsia ne'ebe prova iha prátika. Tanba ita hotu lakohi tan atu monu tama iha gaiola husi problema oioin iha rai ida ne'e”, afirma nia.
Bainhira Espoza PM kandidata-an nu’udar independente ba Prezidente Republika, ida ida ne'e sei fó justisa nafatin ba igualdade jeneru iha nasaun ne'e.
"Tempu ona atu feto ba kompete iha Eleisaun Prezidensiál ida ne'e, mais melhor feto ida ne'ebé iha kapasidade, kompeténsia no koñesimentu kle’an, tanba Timor-Leste presiza tebes Prezidente ida hanesan ne'e”, dehan nia.
Husu ba Timoroan tomak atu hamutuk, ho lian kmo'ok ida, kompromisu furak ida, mehi furak ida, fó apoiu ba Kandidatura feto maluk Isabel da Costa Ferreira ba Prezidente Repúblika. (*)
