“Tanba ne'e, atu kumpri filafali lei nomós rezolusaun ne'ebé mak iha, ohin ita konsentra hamutuk iha ne'e, ita lori halo lansamentu. Bele dehan katak lansamentu hahú husi ohin, ekipa sira-nia prezensa iha ne'e, ho ekipamentu sira ne'ebé sei utiliza iha rai liur, para nune'e aban, ekipa sira ne'e sei halo dezlokasaun ba Pais sira ne'ebé mak sei hala’o resenseamentu nomós atualizasaun baze dadus”, dehan Acilino Bianco, iha serimónia despedida ba dezlokasaun ekipa tékniku sira, iha Salaun STAE, Kaikoli, kinta (30/09).
Tanba Konsellu Ministru (KM) aprova rezolusaun Governu ho númeru 105, ne'ebé mós fó oportunidade ba timoroan sira iha rai liur atu partisipa mós iha resenseamentu eleitóral nomós atualizasaun baze dadus, hodi prepara ba eleisaun prezidénsial iha tinan 2022.
“Ita-nia konstituisaun, ita-nia lei resenseamentu rasik fó direitu hanesan ba ita-nia sidadaun timoroan sira hothotu, tantu iha rai laran, nune'e mós iha rai liur”, hatete nia.
Prezidente Komisaun Nasionál ba Eleisaun (CNE), José zda Costa Belo hatete, resensementu eleitóral no atualizasaun baze dadus ne'e, obrigatóriu ba sidadaun hotu hodi prepara ba eleisaun sira iha tinan 2022.
Diretór jerál Servisu Rejístu Notariádu, Criosgno da Costa Neto esplika, Ministériu Justisa (MJ) liuhusi Diresaun Jerál Servisu Notariadu (DJSN) foin primeira vez, integra iha ekipa ida ho STAE no CNE, atu integra iha laran, hodi bele halo rejistu ba sidadaun sira ne'ebé mak iha Diáspora.
“Aleinde, dokumentu identifikasaun sivíl, nomós pasaporte. Tanba atu halo resenseamentu eleitóral, rekezitu ida ne'ebé mak importante mak, sertidaun moris ou billete de identidade. Tanba ita-nia sidadaun sira iha Diáspora ne'ebá, dokumentu sira ne'e, identifikasaun íl liliu, expired", esplika nia.
Tanba ne'e mak Governu haree sitiasaun ida ne'e, no nesesáriu duni atu integra ekipa rejistu notariadu ninian hamutuk ho STAE atubele halo resenseamentu.
Vise Ministru Administrasaun Estatál (MAE), Lino Torrezăo reforsa, pontu aas liu (kulminante) iha dezlokasaun ekipa tékniku sira ne'e mak halo resenseamentu eleitóral ho atualizasaun baze dadus, atu hasoru festa demokrasia iha tinan 2022.
"Liberasaun ka pelepasan ne'ebé mak ita atu halo dadauk ne'e, ita hatene katak ninia objetivu mak, primeiru ita atu hatete katak, ne'e ita atu ba festa demokrasia ida que boot. Maibé festa demokrasia ne'ebé mak ita atu halo dadauk ne'e, boot la halimar, mais ninia prosesu ne'e, naruk la halimar. Bainhira ita atu to'o iha feste demokrasia ne'e, ninia prosesu ida que naruk. Foku kulminante ne'e mak, resenseamentu eleitóral, ho atualizasaun baze de dadus”, dehan Torrezăo.
Ekipa tékniku ne’ebé aranka ba halo resenseamentu, hamutuk ema na’in-30-resin, husi STAE, CNE ho Notariadu, durante fulan haat, hahú aban 01 Outubru 2021 to'o Janeiru 2022.
Enkuantu, atividade resenseamentu eleitóral no atualizasaun baze dadus ba timoroan sira iha Austrália, sei estende, tanba pandemia Covid-19, no Governu sei halo hela koordenasaun ho ministériu relevante sira iha liur, hafoin halo dezlokasaun ba ekipa sira. (*)
