"Ohin loron 30 de agosto, ita selebra loron vitória mai ita hotu, loron ne’ebe ita selebra, hodi fó onra no gloria ba povu nia determinasaun no aten brani hodi konkista ita-nia liberdade, ohin mós momentu oportunu atu ita halo refleksaun “saida mak ita halo ona hodi valoriza auto determinasaun ne’e”, dehan António Armindo liuhusi komunikadu ne'ebé www.tempotimor.com asesu, segunda (30/08).

Loron 30 Agostu nu'udar loron glorious tanba loron ida ne’e mak Timoroan haklaken Timor-Leste nia ezisténsia hanesan povu independente ba mundu rai klaran, hodi hatutan dalan naruk ne’ebé beila sira hahú hamutuk marsa iha jornada lulik ba auto determinasaun no kulmina luta jerasionál ho konsulta popular iha loron 30 de agosto hodi kontinua hametin Republika Demokratika de Timor-Leste.

Determina ona nia loron independénsia ne'e, sidadaun hotu labele sai hanesan venenu hodi hanoin destroi nasaun de'it maibé nu'udar umanu ida ne'ebé hametin dezenvolvimentu nasionál.

"Sera ke ha'u sai poténsia hodi hametin unidade nasionál ka ha'u sai venenu no obstaklu hodi harahun no destroi de'it, sera ke ha'u sai kapitál ba dezenvolvimentu nasionál ou keta ha'u sai ameasa ai-tarak no moruk ba ha'u rai doben", hatete nia.

Loron ne'e, momentu atu selebra sidadaun hotu nia triumfu no momentu atu hase malu hanesan maun alin, tempu atu buka malu, tempu atu ko'alia ba malu no momentu atu rekoñese katak unidade nasionál mak forsa, Unidade nasionál mak xave ba dezenvolvimentu no estabilidade nasionál.

"Ohin loron 30 de agosto, ita hanoin hikas ita-nia pasadu ne’ebé nakonu ho terus, susar no mata wen, ita monu la hakiduk, mate la sura, maibé mós la mohu tanba nafurin ho espiritu kombatente sosa ita-nia liberdade. Ita marsa ho aten brani ho espiritu unidade nasionál hasoru laloran no anin boot hodi kontinua hakilar ho lian maka’as liafuan lulik “Mate ka Moris Ukun Rasik A’an”, afirma nia. (*)