"Ita sei hatudu fila-fali kapasidade Povu Timoroan nian ne’e iha siklu foun esperansa nian, ne’ebé motiva liuhusi Planu Nasionál Vasinasaun kontra COVID-19, ne’ebé permite ita hodi haree ba futuru ho otimizmu ida-ne’ebé nakonu ho oportunidade sira, hodi lori kreximentu no kria benefísiu ekonómiku signifikativu sira ba ema hotu”, dehan PM Taur liuhusi nia komunikadu imprensa, sesta (30/07).

Tanba futuru ida ho dezafiu sira ne’ebé sei ezije esforsu boot ida ba reforma sira no empeñu hodi apoia Governu ida-ne’ebé efikás no efisiente, koordenadu, menus burokrátiku, dijitál, ho kapasidade hodi estimula diversifikasaun ekonómika no atrai investimentu sira, hodi insentiva produsaun nasionál no kriasaun rikeza iha país laran.

Ho futuru ida-ne’ebé labele manan mesak, maibé depende ba partisipasaun sidadaun, família, empreza no organizasaun sosiedade sivíl sira no depende mós ba apoiu husi parseiru sira dezenvolvimentu nian.

"Ha’u hakarak aproveita sorumutuk ne’e hodi transmite ba imi-hotu ne’ebé marka prezensa iha ne’e, ita-nia gratidaun no agradesimentu ne’ebé kle’an ba papél importante ne’ebé Parseiru sira Dezenvolvimentu nian hala’o ona iha fulan sanulu-resin-hitu ikus Pandemia COVID-19 nian ne’e no ho apoiu sira foin lalais ne’e ba vítima dezastre naturál sira ne’ebé akontese iha Timor-Leste”, hatete Taur.

Apoiu sira ne’ebé, ho tulun husi parseiru dezenvolvimentu sira, permite ona tau iha terrenu operasaun emblemátika boot sira hanesan Sesta Bázika ka Planu Nasionál Vasinasaun kontra COVID-19 nian, ne’ebé durante fulan-jullu ne’e hakat liu ona benefisiáriu 260.000 ho doze dahuluk, ne’ebé abranje besik 35% husi populasaun nasionál.

“Apoiu sira ne’ebé loloos kontribui ba estatístika atuál sira, ho redusaun ne’ebé beibeik, iha fulan rua ikus ne’e, ba kazu foun infesaun nian sira, inklui kazu sira ne’ebé grave liu”, dehan PM Taur. (*)