Prezidente Komisaun A, deputadu Joaquim dos Santos hatete, prosesu kona-ba halo tranzisaun diretu pensaun vitalisia ba seguransa sosial ne'e sei pendete tanba sei hein informasaun balun parte governu.

“Tantu problema ne'e atu halo tranzisaun, hanesan iha semana kotuk ha’u dehan ne'e, halo tranzisaun de diretu ne'e, ita tenke estuda didi’ak, para tranzitu ema nia diretu karik labele fó fali prezuizu ba benifisiariu sira, ne'ebe prosesu ne'e hala'o hela”, dehan nia iha Parlamentu Nasional (PN), kinta (01/07).

Komisaun A mós iha intensaun atu aselera lalais prosesu ne'e tanba, públiku tenke hatene konseitu ida pensaun vitalisia ne'e laiha ona, iha de'it mak rejime remuneratoriu.

Maibé Xefe bankada CNRT, Duarte Nunes hatete, kona-ba muda lei pensaun vitalisia ne'e prezidente Komisaun A mós fó sai ona, buat hotu iha sira-nia liman, tanba ne'e CNRT nu’udar bankada opozisaun prontu hein atu hala'o diskusaun no fó opiniaun.

“Lahatene, husu iha komisaun, ita haree tok, buat hotu iha sira-nia liman, ami hein de'it tama iha diskusaun, ami fó ami-nia opiniaun”, dehan deputadu Duarte iha PN, sesta (02/07). (*)