“Señor Primeiru Ministru fó ona orientasaun. Orientasaun primeiru mak ne'e, ba Ministra saúde no ekipa Interministeriál vasina nian tenke buka to'o kle'an motivu lolos ba señora ne'e, ba señora ne'e lakon vida mak saida?. Tenke hatene to'o kle'an”, dehan Ministru Prezidénsia Konsellu Ministru, Fidélis Leite Magalhães iha Palásiu Governu, kinta (01/07).

Konsellu Ministru mós rona ona detalla desde tuku hira mak matebian Hilária ba fatin Vasina no bainhira mak la'o fila ba uma, no saida mak kauza, matebian hodi dezmaia no kondisaun saida mak iha antes.

Nune'e mós orienta Ministra Saúde sei rekolla hodi esplika ba públiku razaun matebian Hilária hakotu nia vida.

“Señor Primeiru Ministru orienta ba Ministra saúde para tenke fó atensaun sériu no konfirma ke'e ho kle'an razaun sira ba falecimentu señora nian para esklarese ba povu motivu loloos ne'e saida, ne'e kauza tanba vasina ou la’e”, afirma nia.

Husu mós ba ekipa liña ministeriál atu book-an lalais, ba ekipa munisípiu hodi ajuda família responde imediata ba situasuan ne'e, nomós ekipa saúde hamutuk ho Ministériu sira atu nune'e tanba Primeiru Ministru mós hakarak rona diretamente informasaun iha terenu. (*)