“Ha’u prefere segunda-feira ita debate urjensia la’os hanesan orden do dia bai-bain mais antes orden do dia, dader kedas, mais ne’e oras ida de’it, assuntu espesifiku no deputadu sira la iha rekerimentu kona-ba debate urjensia”,dehan Prezidente Parlamentu Nasional, Aniceto Guterres iha Parlamentu Nasional, tersa (07/02).

Diskusaun urjensia ne’e, sei konvida Ministra Saúde, Odete Maria Freitas Belo mós marka prezensa hodi buka solusaun ne’ebé adekuadu atu labele akontese tan kazu hanesan iha tempu tuir mai.

“Hodi tau interese saúde públiku, tanba ne’e presiza tebes atu hetan resposta husi governu, inan ho oan mate hamutuk ne’e, biar ida rua de’it mak akontese, mais ita tenke tau seriu, segunda-feira”, nia dehan.

Nune’e, husu ba Sekretária Meza Parlamentu Nasionál atu halo rejistu debate refere hodi fo solusaun ida satisfas ba família matebian sira.

Ita debate iha segunda-feira no ita envia ofisiál ba Ministra Saúde”, nia hateten.

Alende ne’e, deputadu husi Bankada Partidu Demokrátiku (PD), Adriano do Nascimento mós husu atu halo inesvtigasaun ba família sira ne’ebé momentu akompaña matebian ba Sentru Saúde Lolotoe, maibé la konsege atende hodi tranfere mai Hospital Nasional Guidu Valadares (HNGV) Dili.

“Ha’u hatete Ministra Saúde halo investigasaun, husu mos ho família husi ninia laen nia aman hateten, mai ne’e la iha perawat, sira iha oin ne’e uza faru kondotor nian hotu kedas, na’in rua iha duni”, nia afirma.

Tanba, bainhira família hamutuk ho matebian desloka husi Maliana mai Dili, matebian konsege partus kedas iha Ambulansia laran antes tama Atabae, nune’e sira para karreta atu ko’a labarik nia hussar, maibé kondotor na’in rua ne’ebé akompaña hateten labele, nune’e kontinua viaje, mai ko’a bebe nia hussar iha Sentru Saúde Atabae.

Hafoin kontinua viajen mai Dili, ikus mai labarik mate iha Likisa área Aipelu nian no nia inan mate iha Hospital Nasional Guidu Valadares (HNGV). (*)