Desizaun Prezidente BTL ne’ebé ezonera no abandona funsionáriu públiku iha DGAS hamutuk 196 iha Nasionál, maibé númeru ne’e seidauk inklui funsionáriu iha Munisípiu 12.

Portavóz funsionáriu DGAS, Joaquim Ximenes hatete, ezonerasuan ne’ebé halo laiha diskrisaun klaru kona-ba funsionáriu públiku.

"Implementasaun dekretu Lei N⁰. 4/2020 25 de Setembro, kria a empreza Públika Bee Timor Leste e Aprova os respetivus Estatutos (Artigo 8) laiha diskrisaun ida ne'ebé klaru kona-ba funsionáriu kuadru públiku iha Servisu Água no Saneamentu (SAS) atu hetan ezonera ka hetan Abandona”, esplika Joaquim iha edifísiu BTL, Kaikoli, segunda (28/06).

Razaun Prezidente BTL ezonera funsionáriu sira tanba laiha kapasidade, koñesimentu maibé funsionáriu maske servisu durante tinan 20 liu iha DGAS.

Tanba ne’e, funsionáriu sira rekomenda ba Ministru Obras Públikas (MOP) atu halo avaliasaun ba termus efetividade implementasaun iha BTL-ep ne'e rasik.

"Rekomenda ba MOP atu halo estudu viabilidade ba BTL,ep, no halo avalisaun ba termus sertu efetividade implementasaun BTL,ep durante fulan neen nia laran”, hatete nia.

Aliende ne’e, husu mós Komisaun Anti Korrupsaun (KAK) no Provedoria Direitu Humanus no Justisa (PDHJ) atu halo Investigasaun prufundu ba problema sira ne'e.

Ba deklarasaun funsionáriu sira ne’e, jornalista www.tempotimor.com tenta konfirma Prezidente Bee Timor Leste, Carlos Pelois dos Reis, maibé okupa ho servisu seluk. (*)