Login to your account

Username *
Password *
Remember Me

SEKoop Atribui Sertifikadu Ba Kompaña no Autoridade Lokál Iha Likisá

SEKoop, Elizário Ferreira foto hamutuk ho autoridade sira hafoin ensera distribuisaun sesta bázika iha salaun Administrasaun Postu Likisá Villa, sesta (25/06). SEKoop, Elizário Ferreira foto hamutuk ho autoridade sira hafoin ensera distribuisaun sesta bázika iha salaun Administrasaun Postu Likisá Villa, sesta (25/06). Foto Tempo Timor

Tempotimor (Likisá)-Sekretária Estadu Kooperativa (SEKoop) atribui seritifikadu apresiasaun ba kompaña fornesedór nomós autoridade lokál (AL) sira durante servisu hamutuk hodi implementasaun programa sesta bázika iha munisípiu Likisá.

“Primeiru, atu agradese ba kompaña sira, aseita atu hola parte iha distribuisaun sesta bázika. Ha'u mós husu ba autoridade lokál sira, dala-ruma la hakmatek, ami sempre kontu hela de'it imi”, hatete Sekretáriu Estadu Kooperativa (SEKoop), Elizário Ferreira, iha salaun Administrasaun Postu Likisá Villa, sesta (25/06).

Iha realiza serimónia enseramentu ba distribuisaun ai-hán Sesta Bázika SEKoop entrega sertifikadu nu'udár apresiasaun ida ba servisu hamutuk hodi finaliza distribuisaun ai-hán ba populasaun sira.

SEKoop mós distribui sertifikadu ba membru Polísia Nasionál Timor-Leste (PNTL) liuhusi komandu munisípiu Likisá, ne’ebé reprezenta husi komadante nomós Komandu Falintil-Forsa Defeza Timor-Leste (F-FDTL) reprezenta husi komandante postu Komponente Navál nian, tanba fó apoiu seguransa durante fahe ai-hán ba benefisiáriu sira.

Reprezentante Administradór Munisípiu Likisá, Salvadór Serão dos Santos hatete, programa Governu nian kona-ba sesta bázika, tanba mosu pandemia globál Covid-19 hodi halo populasaun barak mak moris iha situasaun ekonómika ida la serteza.

“Tanba ida ne'e, ho programa governu nian ba sesta bázika, ne'ebé mai tama iha Likisá, hanesan autoridade munisipál, ami agradese teb-tebes ba governu nomós ba kompaña ne'ebé bele fasilita ai-hán sira ne'e ba to’o iha komunidade kbi'it la’ek sira”, dehan nia.

Hanesan autoridade munisipál, husu deskulpa mós ba lakunas balu mosu husi komunidade sira hasoru ekipa sira durante distribui ai-hán iha munisípiu Likisá.

Maibé rekomenda ba SEKoop atu haluan tan atividade kooperativa ne'ebé grupu sira halo iha sira-nia munisípiu, bele tulun sira liuhusi fó insentivu ruma hodi hakbi'it setór ekonómia, agrikultura no turízmu oinsá bele la'o ba oin.

Entretantu Xefe Suku Dato, Oscar da Silva hatete, durante tinan ida nia laran, ema hotu preokupa ba hahán laiha, tanba kauza husi problema Covid-19, maibé governu mós iha polítika Sesta Bázika, hodi responde ba ekonómia família sira ida-idak nian nu'udár sasukat ida hodi rekupera fali ekonómia povu.

“Ho sertifikadu ida ohin ami simu ne'e, agradese tanba estadu rekoñese mós ami Xefe Suku sira-nia kontribuisaun ba governu, dezde fahe sesta bázika iha ne'e, e ami agradese tebes, tanba ai-hán sira ne'ebé governu fó mai ne'e, ajuda ona komunidade sira. Dalaruma oituan de'it, maibé ami hanesan autoridade iha baze, ami prontu simu programa saida de'it husi ita-nia governu sentrál”, haktenik nia.

Kompaña sira ne'ebé durante fornese ai-hán sesta bázika ba populasaun kuaze rihun-102 -resin sira iha munisípiu Likisá mak hanesan, Betuhei, Green Mota Ain, ho Star World.

Iha munisípiu Likisá Postu Administrativu hanesan Bazartete, Maubara ho Likisá Villa ho Suku hamutuk 23. (*)

 

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter