Tanba dadus ne’ebé aprezenta husi ministériu sira ne’e lka hanesan no halo komúnidade balun seidauk bele hetan sesta bázika, maibé sei hetan faze tuir mai, tanba sei hadi’a hela dadus balun ne'ebé la kompletu.
“Problema tanba saida mak balun hetan balun la hetan ou halo reklamasaun, tanba dadus ne'e mak la kompletu, dadus husi MAE fó ketak, husi MSSI mós fó ketak entaun dadus balun repete, nune'e ita sei haree hela oinsá atu hadi’a filafali”, esplika Ministru Francisco Jerónimo iha palásiu governu, tersa(18/06).
Maske tuir planu governu, distribuisaun sesta bázika sei remata iha fulan-juñu tinan 2021, maibé ba sira ne'ebé reklamante ka sira ne'ebé mak seidauk hetan sei hetan hotu.
“Antes atu termina sesta bázika ne'e, governu sei fó nafatin sira-nia direitu ba ida ne'e, tanba ne'e ita sei halo kompilasaun atu haree filafali ba sira ne'e hotu, tanba iha dadus balun dubru, nune'e mak sira balun seidauk simu”, dehan nia. (*)