Diretóra PNDS Nasionál, Claudina Soares Pinto, esplika, artigu 58 ne'ebé previstu iha Konstituisaun RDTL garante ba sidadaun hotu tenke hela iha uma dignu, nune'e Governu implementa programa UNP hodi liberta nia povu husi hela fatin kondisaun aat.
Nune'e iha tinan 2021 Governu aloka uluk tokon US$25 hodi finaliza ba UNP hamutuk rihun 1.254, iha tinan 2022 aloka tán tokon US$75 konstrui UNP rihun 5, iha mandatu ikus mós preve tán ona orsamentu atu konstrui uma ba nia sidadaun sira.
"Tinan ida ne'e ita sei harii tán uma 3.700-resin, ho orsamentu pur-volta US$63 millões", dehan nia iha vila antiga, Kinta (23/02).
Enkuantu tuir dadus uma kondisaun aat iha teritóriu laran hamutuk rihun 200, nune'e Governu hahú rezolve fazeadamente husi tinan 2021-2023 hamutuk ona rihun 10 liuhusi UNP, maibé seidauk atinji, tanba mandatu hela tinan rohan.
"Sei falta rihun 190-resin uma mak ita presiza kompleta, sé Governu ida ne'e nafatin komitmentu atu kontinua até tinan naruk, númeru ne'e ita bele reduz", nia argumenta
Entretantu UNP ne'ebé Governu harii ona iha tinan 2021-2022, benefisiáriu sira presta ona desklarasaun katak, benefisiáriu sei kuidadu uma, la-fa’an fali ba ema seluk, la-fó aluga ba ema seluk no benefisiáriu sei ho komitmentu rasik halo manutensaun ki'ik, wainhira hetan estragus ruma, tanba Governu preve de'it osan ba konstrusaun, laiha orsamentu ba reabilitasaun. (*)
