Komadante APC Servisu Munisípal, Inspetór Polísia, Aleixo Ximenes, esplika, tinan 2023, Governu Japaun apoiu viatura bombeiru hamutuk 3 ba APC Timor-Leste, nune'e iha loron 21 fulan-fevereiru tinan 2023 halo distribuisaun ba servisu Munisípál 2 hodi kombate insendiu.
"Karreta Governu Japaun mak apoiu ba ita, karreta hamutuk 3, fahe ba Munisípiu 2, Baukau ida Kovalima 2", dehan nia iha kna'ar fatin Tirilolo, Sesta (24/02).
Enkuantu viatura bombeiru ne'ebé Governu Japaun fó apoiu, ho konsdisaun labele tula bee, tanba laiha tangke, maibé sei simu bee husi tangki seluk hafoin atua insendiu.
Maske kondisaun viatura nune'e, maibé bele atua insendiu ho di'ak, tanba bele rega bee ba insediu ho distánsia do'ok, tuir kauliadade no kapasidade mákina rega bee nian.
"Karreta ne'e la'os direitamente rega bee ba ahi-han uma, maibé nia tenke simu bee husi tangki seluk mak rega, mais nia la fó difikulta ba ita, tanba nia forsa rega bee ne'e bele to'o metru-50 bainhira ita karreta makas", nia esplika
Husi apoiu ne'e viatura bombeiru iha Baukau hamutuk ona rua, ne'ebé inklui ho viatura tangki bombeiru antigu, maibé seidauk sufisiente atu atua insendiu ho urujente, tanba Munisípiu Baukau, iha nia Postu Administrativu 6, ne'ebé kuaze distánsia do'ok husi edifisiu APC nian.
Tanba ne'e presiza Governu Timor-Leste kompleta tán viatura bombeiru 2 hanesan fornesedór bee nian, nune'e bele fó garantia ba atuasaun insendiu iha terreñu.
"Mais ita pelu menus kontente ona, tanba Estadu Japaun fó ona apoiu uza ba ita nia komunidade bainhira iha insendiu", nia akresenta
Enkuantu husi apoiu ne'e, kompleta kedas ho ekipamentus importante kombate insendiu nian, hamutuk unidade 49, ne'ebé sei uza husi pesoál servisu APC no bombeiru iha Munisípiu Baukau hamutuk na'in-168.
Entretantu Munisípiu Baukau nia área luan 1,504.2 km2 kompostu husi Postu Administrativu-6, Suku-59 iha OPS-59, no totál populasaun hamutuk 126,562, husi populasaun hirak ne’e, maioria ko'alia lian Tetun, Makasa'e, Waimu’a, Midiki, Kairui inklui Naueti. (*)
