Sekretariu Jeral CNRT no Koordenadór Jeral AMP, Francisco Kalbuadi Lay hatete, to’o ohin loron nia seidauk rona, nein uitoan, informasaun kona-ba remodelasaun.

"Kona-ba remodelasaun, enkuantu to'o agora ha'u hanesan Koordenadór Jerál ba Aliansa Mudansa ba Progresu ha'u seidauk rona, nein uitoan, ami seidauk diskute tan,” dehan Kalbuadi iha Konferensia loron daruak AMP iha Terra Santa, Dili, Domingu (16/06).

Nia dehan, durante ne’e mosu rumoris barak no espekulasaun oioin kona-ba remodelasaun.

“Mais rumoris barak (kona-ba remodelasaun), atu ko'alia ida ne'e direitu sidadaun idaidak nian, see de’it atu espekula, polítika mak hanesan ne'e."

Maibé, nia afirma, to'o ohin loron koligasaun AMP sei solidu no unidu, nune’e sei laiha remodelasaun.

"Iha ne'e membru governu sira, parlamentu sira, sira sei konsentra di’ak liu tan. Tanba nune'e mak ami hasoru malu loron rua iha ne'e atu konsolida malu, atu fortifika tan ami-nia unidade, par ida-idak bele konsentra hodi serbi ba povu no nasaun ida ne'e di’ak liu tan iha futuru," deklara Kalbuadi.