Iha debate Orsamentu Rektifikativu ne’ebé hetan partisipa husi bankada 6 iha Parlamentu Nasionál (PN) hodi aprova iha faze jeneralidade, ho votu afavor 44, no votu abstesaun 21 ne’ebé mai husi deputadu Sira bankada CNRT.
Rezultadu votasaun afavor 44 ne'e mai husi bankada FRETILIN 23, PLP 8, KHUNTO 5, PD 5, UDT 1, FM 1, no abstensaun 21 husi deputadu bankada CNRT.
Vise xefe Bankada CNRT, Deputadu Patrocínio Fernandes dos Reis, hateten CNRT deside fó votu absteinsaun tanba alterasaun no ezersísiu ba OJE 2021 hamutuk tokon US$89 no husu tán aumentu Miliaun US$135,3 fó impaktu OJE 2021 sei sa’e ba billaun US$2,030.
Bankada CNRT haree lolos ne’e Orsamentu Rektifikativu laiha fatin tanba laiha kontribuisaun ba ekonomia, programa rekuperasaun ekonómika paradu totál no la kontribui ba kresimentu ekonómika.
"Haree husi orsamentu orijinál 2021 ho montante billaun US$1,895, tetu mós kapasidade no dezempeñu ezekusaun real iha loron 19 Abril 2021 foin mak atinje 18.9% de’it. Hatudu katak Orsamentu Rektifikativu ida-ne’e laiha fatin atu diskute no aprova”, dehan nia liuhusi diskusaun jeneralidade ba proposta retifikativu iha PN, tersa (20/04).
Xefe Bankada FRETILIN, Deputadu Francisco Miranda Branco, deklara Fretilin fó apoiu tomak ba orsamentu retifikativu tanba bele ajuda governu atu rezolve kestaun infraestrutura ne’ebé hetan estragu no fasilita governu prevene covid-19.
“Bankada FRETILIN fó apoia Governu hodi responde situasaun COVID-19 no kalamidade ne’ebé hamate ita-nia ema na’in 40 no oras ne’e família sira tutur lutu-metan tanba impaktu hosi kalamidade boot ne’ebé akontese iha loron 4 abríl,” dehan nia.
Entretantu governu propoin montante orsamentu hamutuk tokon US$223,8 ne’ebé realokasaun husi Fundu Infraestrutura ho valór tokon US$62, nomós dotasaun tudu Governu ho montante tokon US$26,5 no integrasaun saldu jerénsia ne’ebé la inskritu iha OJE 2021 ho montante tokon US$135,3.
Aleinde orsamentu hirak ne'e sei koloka ba kombate no halo prevensaun pandemia COVID-19 ho valór tokon US$51,2, medida apoia sósiu-ekonómika tokon US$81,7, finalizasaun pagamentu Sesta Bázika tokon US$31, atribuisaun suplementu remuneratóriu ba traballadór liña frente UStokon US$51,9 no dotasaun kontinjénsia ba fundu COVID-19 tokon US$8. (*)
