"Asaun ida ne'e hatudu ba povu ne'e laiha morál, membru Governu ida mak tun ba kaer manu futu fali ne'e, loloos ida ne'e la'ós ninia papel”, hatete nia iha PN, kinta (16/12).

Bankada CNRT haree katak asaun ida ne'e tuir loloos setór privadu no ema sira jogadór mak halo no la'ós membru Governu sira.

Bainhira Governu mak halo ida ne'e, siknifika ministru sira mesak jogadór de'it mak iha ne'e.

Tuir loloos eventu hanesan futu manu ne'e, Ministériu tuteladu sira mak halo atu loke iha eventu sira hanesan loron boot ruma ne'e normál.

Tanba ida ne'e nu’udar jogu tradisionál ne’ebé Timor-Leste halo, enkuantu servisu ida ne'e la'ós papel Ministru Agrikultura no Peska maibé ne'e Ministériu seluk ne'ebe mak tutela ba ida ne'e.

Deputadu CNRT ne'e kestiona maka’as ho asaun Ministru jogadór, ne'ebe sira hatama manu ne'e komforme sira-nia hakarak iha situasaun pandemia Covid-19.

"Hatama mai mós ita haree katak Estadu Emerjénsia mak laiha ona, mais prevensaun saúde nian ita la’o nafatin. Entaun virus sira ne'e kan liuhusi buat sira hanesan ne'e, bele fó impaktu moras ba ita-nia povu sira, liliu manu sira hanesan ne'e”, hatete nia.

Bankada CNRT haree katak prosesu atu hatama manu mak rai laran ne'e tenke tama kuarentena, no tenke halo tratamentu di'ak, no kompeténsia ida ne'e kabe ba Ministériu Turismu Komérsiu Indústria (MTKI), maibé la'ós kompeténsia Ministru agrikultura. (*)