Maske iha semana hirak nia laran, governu planea no halo komunikasaun entre embaixada Timor-Leste iha Cuba, bainhira preparadu tiha, ikus mai falla iha ezukusaun tanba sira laiha vistu atu tama liuhusi nasaun Fransa.

“Ita iha komunikasaun ba malu duni maibé falla iha ninia ezukusaun, katak bainhira komunika ba malu no preparadu atu mai, ita-nia estudante sira seidauk iha vistu ne’ebé atu tama Fransa, entaun aviaun ne'e mós tenke aranka ona, fó tempu ba sira mak la konsege halo ona, entaun labele bandu aviaun atu mai”, hatete nia ba www.tempotimor.com iha Parlamentu Nasionál, tersa (16/03).

Ho preokupasaun ne'e, parte governu mós sei haree filafali ba futuru, atubele hadi’a para labele repete tan iha futuru.

"Aprende husi buat ne’ebé mak iha, katak antes atu to'o iha ne'eba ita prepara ona vistu ne'e atu nune'e bainhira aviaun atu sai, labele tan iha preokupasaun kona-ba vistu,” espera nia.

Maibé governu nafatin iha responsabilidade atu halo kontaktu ho embaixada Timor-Leste iha Ciba, atu haree estudante sira ne'e, nomós sei halo koordenasaun ho Ministériu Negosiu Estranjeiru no Kooperasaun (MNEK) inklui Ministériu Saúde (MS) atu haree halo implementasaun planu liuhusi fundu ne’ebé mak apoiu husi Ministériu Ensinu Superior no Siénsia no Kuktura (MESSK).(*)