Deputadu José Vergilho hatete, osan ne'e nu’udar ran estadu no mai karik atu dezenvolve no responde nesesidade povu nian.

Tanba ko’alia kona-ba dezenvolvimentu, ne'e presiza osan, no osan ne'e tenke lori ona mai atubele halo dezenvolvimentu.

"Ha’u atu fó hatene, bainhira los mak osan 2021ne'e mai, tanba osan ne'e povu nian, ita ko’alia kona-ba dezenvolvimentu osan ne'e osan povu nian. Osan ne'e tenke mai para dezenvolve ita rain, agora bainhira los mak osan ne'e mai, hakarak husu ba governu de faktu ida ne'e”, dehan nia iha plenária Parlamentu Nasionál, tersa (16/03).

Maibé deputada bankada Partidu Libertasaun Popular (PLP), Maria Angelina Sarmento haktuir, imposivel governu atu deklara paradeiru osan, tanba ida ne'e konpetensia governu ho Banku Sentral Timor-Leste (BCTL) de'it mak bele hatene.

Wainhira atu halo levantamentu, governu nunka promete katak sei halo pedidu iha loron ida ne'e.

"Se kuandu haree saláriu hotu la'o noramal, hatudu katak ita-nia osan iha hela”, dehan nia.

Nune’e Ministru Asuntu Parlamentar no Komunikasaun Sosial (MAPKOMS), Francisco Martins Jerónimo, konsidera kestaun pedidu levantamentu ne'e, governu liuhusi Banku Central Timor-Leste (BCTL) haruka tiha ona iha fulan-fevereiru tinan 2021.

“Ida ne'e ha’u la presiza halo resposta tanba iha loron hirak liu governadór Banco Central Timor-Leste, hasai ona konferensia da imprensa, esplika ona ba públiku katak levantamentu fó tiha ona iha fulan-fevereiru, ne’ebé ha’u hanoin katak ne'e la'ós problema”, afirma nia.(*)