Diretór ezekutivu Fundasaun Mahein (FM), Joăo Almeida hatete, kazu ne'e rasik halo públiku no partikular ba FM sente lamenta tebes tanba sidadaun na'in-rua ne'e halo hela funsaun hanesan rekolla lixu sira iha kapitál Dili.

"Purtantu, iha video ne'ebé espalla ita haree katak membru ne'e rasik hatudu komportamentu ida ne'ebé ema hotu la aseita no presíza tenke iha justisa. Tanba sá, tanba aktu ne'e rasik ita haree katak, iha ona indísius forte kona-ba kríme", dehan nia iha nia kna'ar-fatin iha Bairro dos Grilhos, kinta (11/03).

Maske husi komandu jerál PNTL rasik fó ona respósta katak sei halo investigasaun ba oknum ne'e, maibé nia mós kontinua husu ba komandu atu halo investigasaun.

"Aleinde loke prosesu investigasaun kriminal, maibé mós prosesu kriminál ba hahalok ida ne'e", dehan nia.

Maibé, kestiona kona-ba intervensaun oknum PNTL nian ne'ebé hatudu iha video ne’e rasik lahatene loloos, motivu saida maka membru ne'e rasik halo.

"Maibé atu ida ne'e tenke iha investigasaun, atu nune'e labele aproveita situasaun estadu emerjénsia ka serka sanitária, polísia sia uza ninia kompeténsia hodi impoin tuir ninia hakarak rasik, tanba atu ne'e rasik loloos labele akontese", haktenik nia.

Tanba, prosesu kazu dixiplinar to'o demisaun ninian rekursu to'o de'it iha Ministériu Interior (MI) ne'ebé bazeia ba lei regulamentu dixiplinar PNTL foun ne'ebé tama ona nia vigor iha tinan 2020 kotuk, tanba ne'e husu komandu loke prosesu dixiplinar no kriminal.

Iha prosesu dixiplinar nian, kompeténsia iha komandu, bele halo desizaun, tantu sansaun administrativa, suspensaun ka demisaun, depende husi investigasaun ne'ebé dadaun ne'e la'o hela atubele haree medida saida mak bele toma iha atu ida ne'e.

"Entaun ita husu atu aplika prosesu rua ne'e, prosesu dixiplinar, la'o tuir lei dixiplinar PNTL nian, no prosesu kriminal ba hahalok ne'ebé elementu ne'e rasik halo tuir lei ne'ebé iha kódigu penal Timor-Leste nian", dehan nia.

Husu mós ba Provedória dos Direitos Humanos e Justiça (PDHJ) atu akompaña mós prosesu investigasaun ba membru ne’e, nune'e prosesu hotu bele hala'o ho transparánsia.

Tanba tuir nia haree katak, dala-ruma komandu dehan sei investigasaun, no ida, investigasaun ne'e la'o duni, maibé tanba desizaun ne'e pendente, ka desizaun ne'e hein prosesu ida ne'ebé naruk, dala ruma públiku la akompaña didi'ak.

"Ida seluk, dala ruma prosesu ne'e la la'o, tanba ne'e atu prosesu ne'e la'o ho di'ak, la'o ho transparánsia, husu PDHJ mós akompaña i halo mós investigasaun ba kazu ne'e rasik", nia fó hanoin.

Ho akontesimentu ne’e jornalísta www.tempotimor.com tenta liga ba Diretór Ezekutivu Asosiasaun HAK, Cisto Piedade Ximenes hatete, sira halo ona apoimentu ho vítima maibé seidauk bele foti pozisaun.

“Ami agora halo hela apontamentu ho vitima, ami formula lai buat ruma mak ami fó ami nia pozisaun, tanba ami sei antesipa lai buat ruma atu ajuda informasaun", dehan nia liuhusi telefone, kinta (11/03).(*)