Reprezentante povu husi bankada FRETILIN ho PD hato'o rekomendasaun ne'e relasiona ho atetude husi ema deskoinesidu balun ne'ebe uza fatuk hodi tuda ambulansia iha parte Kaikoli nian.
Xefe bankada Fretilin, Francisco Miranda Branco hatete, komunidade sira tenke respeita desizaun hotu tanba buat ne’ebé governu halo di’ak ba sidadaun hotu.
Tanba tuir tradisaun Timor-Leste nian, ema hakruuk ba regra sira husi lia-na’in sira maibé agora buat hotu la'o tuir lei, no hothotu tenke kumpre.
"Ne'e duni, mak ita hothotu tenke kumpre, la'ós ida-idak halo tuir nia hakarak depois tuda tan ambulánsia”, dehan nia iha Parlamentu Nasionál, kinta (11/03).
Wainhira lei determina konfinamentu obrigatóriu no serka sanitária, iha Dili, nu’udar asaun ida
ba ema nia konsiénsia, presiza nakloke iha emerjénsia ruma, ambulansia no servisu seguransa inklui servisu sanitária bele ba fasilita ema ne’ebé presiza hetan tratamentu urjensia.
"Luta hasoru covid-19 ida ne'e, dalan hothotu tenke nakloke nune'e fasilita ekipa sira hodi atende”, dehan nia.
Deputadu Partidu Demokratiku (PD), Elvina de Souza hatete, nia parte lamentavel tebes ba kazu tuda ambulánsia ne’ebé la devia atu akontese iha ne’e.
“Ha’u hanoin situasaun ne’ebé akontese lamentavel tebes, tuir loloos la devia atu akontese, tanba komunidade sira tuir lolos koopera no servisu hamutuk hodi kombate virus ida ne'e”, afirma nia.(*)