Nia dehan, tuir loloos governu tenke responde uluk ba nesesidade povu sira nian, liuliu iha munisípiu Covalima no Bobonaro, oinsá mak bele apoia ai-haan bázika ba ba komunidade hodi bele rekupera sira-nia ekonómia durante serka sanitária ka lockdown.
“Tanba kuandu komunidade iha uma-laran, sai varanda depois tama fali ba uma laran, povu moris ho kondisaun ida hanesan ne'e, Covid-19 bele la oho ema, hamlaha bele oho ema", dehan Luis Roberto da Silva, ko’alia iha Parlamentu Nasionál, segunda (01/03).
Deputadu Luis dehan, hateten surtu COVI-19 buat ida invizível, tanba laharee ba sé de’it, tanba ne’e governu tenke halo intervensaun ho rápida.
"Sira haree tiha ona, ha'u dehan, mai ne'e sei iha nakukun laran, ita lahatene. Mais kuandu kona-ba la haan no la hemu loron rua, ita sei mate. Ida-ne'e mak husu ba governu kuandu atu kria kondisaun ida estadu emerjénsia, lockdown totál ba munisipiu rua, primeiru ita tenke responde ba nesesidade loron-loron povu nian", hateten nia.(*)
