Projetu dekretu governu nian ne'e aprezenta husi Primeiru Ministru ein-ezersisiu José Maria dos Reis no ohin hetan ona aprovasaun ba alterasaun dahuluk.

Ministru Prezidénsia Konsellu Ministru Fidelis Leite Magalhães informa, alterasaun ba rezolusaun ne'e atu aplika rigorozu ba regra ne'ebé kombate korrente moras Covid-19 nian.

"Pontu prinsipál husi alterasaun ne'e mak re-difini fali distansiamentu sosiál, katak, halo metin liu tan kle'an liu kona-ba regra sira kona-ba distansiamentu sosiál ba individu hotu-hotu ne'ebé mak hela iha Timor-Leste iha territóriu laran, eh hakarak avizu ba públiku katak, obrigatóriu ba ita hotu atu implementa dekretu governu ida ne'e, entaun ho distansiamentu sosiál definisaun ne'e", Fidelis dehan hafoin reuniaun Konsellu Ministru iha palasiu governu, Tersa (29/12).

Nia hatutan, ezizénsia husi dekretu governu ne'e mak husu atu mantein distánsia pelumenus metru ida entre ema ida ba ema seluk.

"Bainhira sirkula ou la'o ain iha dalan públiku ka tama ba resintu públiku ka privadu sira eziji obrigatoriamente mantein distánsia um metru ne'e, tuir mai labele halibur malu liu-husi ema na'in 10", nia informa.

Governante ne’e argumenta, atividade hotu ne'ebé la'o husi agora to'o loron 2 fulan janeiru tinan 2021 tenke kumpri regras hirak ne'e.

"Atividade hotu sira ne'ebé mak tenki halo ho númeru mais 10 pesoas diak liu lalika halo, mais halo eventu ida mak konvida ema lubun boot 150-resin ne'e ita labele halo, ita bele halo grupu ida ema na'in 10, tanba ne'e mak serimónia públiku sira mós tenke redús ninia númeru", nia akresenta.

Fidelis salienta, husi dekretu governu ne'e hotu-hotu tenke uza maskra banhira la'o iha fatin publiku sira no tenke fasi liman bei-beik.

"Husu ba fatin loja sira, fatin publiku sira hotu implementa fali ho rigorozu rekezitus fase liman. Ida ne'e importante atu hotu-hotu bele iha fali asesu ba bee, sabaun bainhira tama iha odamatan resintu públiku ka privadu hanesan loja sira", nia aviza.

Nia mós dehan, medida hirak ne'e aplikavel ba fronteira sira hotu, entaun fronteira nasionál sira hotu sei taka to'o loron 2 fulan janeiru tinan 2021.

"Fronteira nasionál hotu imi hatene katak, loke ka taka ne'e depende ba iha despaixu ida ne'ebé Ministru interiór fó, pur enkuantu Ministru Interiór en ezersisiu halo tiha ona despaixu ida dehan, fronteira sei taka temporariamente to'o dia 2 de janeiru", nia tenik. (*)