Hafoin sorumutu entre KSDS no KS iha Palásiu Prezidensiál bairru-pite Dili, membru husi konsellu rua ne'e foti desizaun kontinuidade ba PR hodi dekreta tan EE dasia.
"PR rona ona opiniaun husi KSDS no KE ne'ebé konsidera favoravél hodi estende EE Dasia, maibé depende ba desizaun Parlamentu Nasionál," Asesór Polítika PR Grigório Sousa hateten ba jornalista sira, Segunda (28/12).
Tuir nia, KSDS no KE rekomenda, tanba ema barak sei feriadu, depois EE da-ualu sei remata iha 2 Janeiru 2021, entaun EE Dasia sei vigór iha 3 Janeiru 2021 bainhira PN autoriza para PR dekreta kontonuidade EE ba Dasia.
Entretantu, regra sira ne'ebé sei implementa iha EE Dasia ne'e nafatin hanesan EE sira liu ba kotuk, maibé antes ne'e mós Ministériu Interiór (MI) hasai ona komunikadu ida katak taka provizóriu fronteira rai, tasi no lalehan to'o loron 2 Janeiru 2021. Entaun iha 3 Janeiru EE Dasia tama iha vigór ne'e sei taka ka lae ne'e depende ba governu.
Nia hatutan, iha lokraik, PR Lú Olo haruka no husu ona pedidu autorizasaun ba PN atu nune’e iha 29 dezembru PN deskute no deside.
Hahú kedan, iha marsu 2020, Timor-Leste rejista totál kazu 44, na’in 31 rekoperadu no na’in 13 sei infetadu. Husi kazu 13 kuaze akontese iha fulan-dezembru. Inklui Organizasaun Mundial Saúde (OMS) rejista ema liu millaun 81 mak afetadu ona husi COVID-19 no liu milaun ida mak mate tanba moras ne’e.(*)