Formandu hamutuk na'in 168 ne'ebé tuir formasaun iha CEFTEC hala'o durante fulan ida nia laran, kompostu husi unidade 6 mak hanesan, Rádiu, Televizaun, Multimédia, Lia tétum jornalízmu, Protokolu no Hakerek imprénsa ba tinan 2020.
Iha diskursu MAPKOMS, Francisco Martins da Costa Pereira Jerónimo husu ba formandu sira atu labele aprende to'o de'it iha faze ida ne'e, maibé presíja aprende nafatin, buka hatene nafatin no tenke lee barak liu tan.
"Ita sira ne'ebé ohin loron aprende, remata ho kursu ida ne'e, labele para de'it hanesan ne'e, lor-loron aprende nafatin atu kakutak ne'e kro’at hanesan katana", MAPKOMS, hateten iha diskursu ne’ebé hala’o iha Salaun CNE Kaikoli, Sesta (18/12).
Nia hateten, formandu sira konklui ona kursu ho di'ak, nomós fó kontente tanba lakleur tan sei simu sertifikadu ida ne'ebé rekoñese hanesan ema ne'ebé antes tama iha CEFTEC seidauk iha level, maibé agora ho level dois, no sertifikadu ne'ebé simu, serve mós ba aplika iha ida-idak nia karreira profisional bainhira termina formasaun iha CEFTEC.
Nia dehan, iha liafuan konsellu ho motivasaun barak maka Prezidente Komisaun Funsaun Públika hameno ona, dadus barak mós mak SEKOMS fó ona ba formandu sira.
"Ha'u apenas atu taka de'it katak, formasaun ne'ebé mak ita-boot sira hetan, ne'e la fásil. Ita-boot sira sei kontinua aprende tan, tanba ema dehan hanesan ne'e, saber năo ocupa lugár. Aprender é para toda a vída. Ha'u hanoin, ho liafuan sira ne'e motiva ita biar ha'u hanesan ministru mós ha'u tenke aprende lor-loron, aprende nafatin, lee nafatin. Ita-boot sira mós iha obrigasaun ida ne'e, atu lee nafatin, aprende nafatin", nia fó hanoin.
Tuir nia, la fásil ba ema ida atu sai ema ida profisional, atu sai ema matenek mós la fásil, tenke halo sakrifísiu barak.
Nia dehan, iha filozófia husi inan-aman sira iha foho baibain atu ba halo toos halai natar, sira sempre kadi uluk katana halo kroat, hafoin bele uza lori hamoos duut no tá kotu ai, hodi aproveita bele kuda buat ruma iha laran.
"Ha'u nia parabéns ba ita-boot sira, tanba konklui ona kursu formasaun jornalízmu iha level dois", Ministru ne’e fó parabens.
Iha fatin hanesan, Formandu husi unidade rádiu, Franzela Pinto hato'o nia sentimentu orgullu tanba nia bele hetan oportunidade hodi tuir kursu iha CEFTEC hodi aprende ona lisaun lubuk ida to'o hetan duni sertifikadu nível daruak (2).
"Liuhusi sertifikadu ida ne'e hodi ajuda ha'u bele kompleta kursu servisu balu ne'ebé loke relevante ho buat balu ne'ebé ha'u aprende antes ona iha área jornalízmu iha komunikasaun sosial UNTL nian", nia hateten.(*)