Lider Karismátiku ne'e ko’alia ho lian makaas katak, bainhira hanoin de'it atu asume kargu ministru diak liu maka taka tiha partidu CNRT, tanba partidu ne’e ninia finalidade la’ós atu halibur ema ne’ebé preokupa de’it ba oinsa kaer ukun.
Xanana ko’alia lia hirak ne’e iha ámbitu reflesaun Natal hamutuk ho kuadru no militante iha sede nasionál CNRT Bairro dos Grilos, Sesta (18/12).
"Ita hotu prepara-an, se ita boot sira senti katak, iha misaun ida, entaun prepara-an atu konsolida buat ida. Se senti katak, bainhira loos ha’u hakarak sai membru governu mais bainhira mak ita manan, hanoin de'it hanesan ne'e, ita sei la konsolida partidu diak liu ita taka tiha keos," Xanana ko’alia.
Ne'e duni, Xanana husu ba hotu-hotu prepara-an agora, lalika hanoin kedas atu rezolve problema ruma ne’ebé mosu mai, fó hanoin nafatin prepara-an di’ak liu tan, konsolida partidu hodi bele hakbiit-an atu defende no valoriza konstituisaun.
Prezedente CNRT ne’e mós dehan, atu rezolve problema ruma, tenke konsolida-an, la'o tuir dalan legál mak konstituisaun.
Iha fatin seluk, tuir fontes konfirmadu husi kuadru partidu CNRT hateten ba www.temptimor.com via telefónika hateten, Prezidente CNRT Xanana Gusmão ko’alia makaas no fó atensaun ba kuadru sira tanba Xanana hahú identifika iha CNRT nia laran eziste ona kubu tolu forte tebes ne’ebé ida-idak konsolida-an daudaun atu aprezenta no kandidata-an ba Seketáriu Jerál iha kongresu ne’ebé sei akontese iha futuru.
Fontes ne’e mós dehan katak, oras ne’e daudaun kuadru CNRT preokupa liu oinsa hetan kargu iha governu, maibé la tau importánsia ba kualidade, no susesu partidu CNRT liuliu ba misaun servi povu.
Fontes ne’e fó ezemplu katak, durante asaun karitativa iha Timor laran tomak, Kay Rala Xanana Gusmão la uza kuadru partidu CNRT nian atu organiza programa ne’e, maibé Xanana fó liu konfiansa ba joven sira mak organiza tanba Xanana hatene katak, kuadru sira CNRT nian barak liu buka lukru no matan naklosu de’it ba kargu.
“Tempu to’o ona atu maun boot tenke hadi’a partidu CNRT tanba, ema barak ho intesaun foer ne’ebé hakarak hafo’er mós lider karismátiku ne’e nia naran iha soseidade Timo-Leste”, fontes ne’e hateten. (*)
