Xanana Husu Kuadru CNRT Rekoñese Sala no Labele Mo’e atu Konfesa

Prezidente partidu Kongresu Nasional Rekonstrusaun Timor (CNRT), Kay Rala Xanana Gusmao ko'alia hela ba kuadrus militantes sira bainhira hala'o reflesaun hodi selebra festa natal no tinan foun iha sede CNRT Bairro dos Grrillus, sesta (18/12). Prezidente partidu Kongresu Nasional Rekonstrusaun Timor (CNRT), Kay Rala Xanana Gusmao ko'alia hela ba kuadrus militantes sira bainhira hala'o reflesaun hodi selebra festa natal no tinan foun iha sede CNRT Bairro dos Grrillus, sesta (18/12).

Tempotimor (Dili)- Prezidente partidu Congresso Nacional Reconstrução Timorense (CNRT) Kay Rala Xanana Gusmão husu ba kuadru polítiku sira iha partidu ne’ebe nia lidera atu rekoñese sala no labele mo’e atu konfessa ida-idak nia erru.

Polítiku ne’e agradese tebes iha oportunidade ida ne'e, tanba lori mós Amu Angelo Salsinha mai hodi halo liturjia ida ho reflesaun murak ne’ebé antes hahú, Amu rasik husu ba polítiku sira iha partidu ne’e hodi rekoñese sira nia sala.

“Ne'e loos, dalaruma ita ba de'it Igreja mak hateten ha’u beik sala, ha’u beik sala, ha’u beik sala liu, mak ne'e de'it. Iha partidu nia laran rasik, ita tenke rekoñese ita nia sala, se la’e, bainhira ita la rekoñese ita nia sala iha partidu rasik nu'udár ema, nu'udár militante, nu'udár kuadru, partidu sei la konsolida, partidu sei la la'o ba oin," Xanana fó hanoin iha ámbitu komemorasaun Natal no tinan foun hamutuk ho kuadru no militante iha sede CNRT Bairro dos Grilos, Sesta (18/12).

Partidu CNRT ukun nasaun ne'e mais ou menus durante tinan sanolu, halo bu'at barak di'ak maibe iha bu'at seluk mos ladi'ak hanesan membru governu lubuk maka kona kazu KKN inklui mos erru seluk nune'e Líder karismátiku Kay Rala Xanana Gusmão kontinua enkoraja kuadru partidu CNRT atu lalika tauk rekoñese sala ne'ebé halo ona.

"Prepara-an, tanba tenke konsolida-an, ita tenke rekoñese ita-nia sala, tenke haree didi’ak, depois lalika mo’e, lalika tauk, ó kumpri misaun ida, lalika mo’e dehan loos duni ha’u sala, tanba servisu ne'ebé ha’u kaer, kaer sala tiha, buat ne'ebé ha’u atu fó ba ne’eba, ha’u la fó buat ne'e, la la'o, hanoin katak, partidu ne'e hanesan ai-oan ida, ita kuda tiha la rega depois ita fó sala ba ai, ne'ebé ita nia partidu bele bot tan, mas bele fraku iha buat sira ne'e hotu", Xanana motiva kuadru no militante sira nakonu ho esperansa.

Xanana husu ba kuadru no militante sira katak, tenke prepara-an ona, bainhira tama tinan foun saida mak bele halo hodi hadi'a Timor-Leste nia dezenvolvimentu.

"Ho ida ne'e mak husu boot ba ita hotu, tanba iha Natal ne'e, ita tama reflesaun, tinan seluk mós mai ona, ita atu halo saida! Nu'udár ema ida-ida iha nia uma, nu'udár partidu nia ema mak ita hotu iha ne'e, atu halo reflesaun, nune'e de’it mak ita bele konsolida partidu, nune'e de’it mak hakbiit no hametin liu ita nia partidu atu dalan ne’ebé Ita hili ona atu tuir ba, ita sei to'o iha ne’eba ho Maromak nia grasa sei kumpri tuir ita nia vizaun servi nasaun ne'e hodi hala'o ita nia misaun hodi servi povu ida ne'e", Xanana nia reflesaun.

Lider nasionál ne’e mós fó hanoin katak, atu hametin partidu tenke nakloke ba malu, fahe matenek, no esperiénsia ba malu.

"Oan sira mesak nurak no matenek dalaruma sala balun mós mak ida ne'e, hatene tiha buat ida, ita halo an tiha, ne'e ha’u nian, o nian nusa! Koñesimentu ne'e o nian mesak, la’e, ha’u nia apa mak selu ha’u ba universidade o mak selu ga! Fahe ba malu, esperiénsia fahe ba malu, matenek ruma, fahe ba malu atu ita hametin partidu ida ne'e", lider ne’e husu.

Prezidente CNRT ne’e observa katak, erru ne’ebé mosu iha partidu laran mak durante ne'e kuadru no militante ladún halo servisu ne’ebé konsulta malu no ladún liga malu.

"Corona mosu mai ikus, Corona partidu mosu uluk ona, lakohi rona malu, atu ko'alia ida ne'e, dehan ne'e la'os o nian, ne'e la'os hau nian, ne'e o nian, nune'e fali ga! Ne’ebé reflesaun ba ita fiar ba Maromak la lika tauk husu nafatin Maromak nia grasa, bensaun, atu hasai hotu tiha buat sira ne'e, ha’u temi buat sira ne'e, tanba ita familia boot partidu ninian", Xanana hateten.

Ne'e duni, prepara-an, hadi'a-an, konsolida-an, tanba lia-fuan sira ne’e la'ós teoria de'it, lia-fuan sira ne'e ho hanoin katak, nakonu ho esperansa hasai tiha tauk husi idaidak nia fuan, katak CNRT konsolida-an.(*)

Rate this item
(0 votes)
Last modified on Saturday, 19 December 2020 22:20
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« March 2021 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

Tempo Timor Networks