Portavoz MUTL Ahoda Andrade hateten, kanselamentu ba joven kandidatu Seasonál Workers Program (SWP) hodi ba servisu iha Australia hamutuk na'in 15 ne'e la'ós sistema aviaun mak la simu maibé lideransa SEFÓPE mak laiha kapasidade.
"Hare’e ba problema ne’e ami nota katak SEFÓPE ho nia staff sira ne’ebé daudaun asumi hela knaar importánte ida ne’ebé sai makina profesionál ka makina promotór ba joven sira, kuaze laiha kapasidade oinsa atu dezemvolve ka promove fóinsa’e sira iha ámbitu kampu de traballu," Ahoda dehan liuhusi konferénsia imprensa iha Kampus UNTL, Kuarta (9/12).
MUTL mós ezije ba Sekretáriu Estadu SEFÓPE Alarico do Rosario presiza intende didi'ak relatóriu Multidimensionál Proverty Index (MPI) ne'ebé hatudu Timor-Leste nia númeru ki'ak atinje 41,8% ne'ebé hola parte primeiru lugar iha azea pasífiku.
"Relatoriu Diresaun Estatistika Nasionál (DEN) nian iha 2019 hatudu katak joven TL ne'ebé dezempregadu hamutuk 30%, ne'ebé hatudu mai ita kuaze joven husi idade 23 ba leten mak maioria liu dezempregadu," nia hateten.
Liga ba relatóriu sira ne'e, MUTL konsidera kanselamentu joven na'in 15 ba Australia ne'e la razoavél.
"Ida ne’e hatudu ona pontus negativu katak, númeru dezempregadu kontinua sa’e ba bei-beik, konflitu iha sosiedade nia let sei kontinua aumenta," nia dehan.
Alende ne'e MUTL mós nota katak, SEFÓPE la’ós ona ramu do governu ne’ebé atu reprezenta joven sira iha Timor-leste, hodi kria kondisaun profesionál ba joven enjerál iha Timor-Leste, maibé reprejenta fali sira-nia familia, individu, grupu ka organizasaun ida nian.
MUTL mós kondena maka'as deklarasaun Sekretáriu Estadu SEFÓPE no nia Diretór sira ne'ebé dehan, kansela traballadór na'in 15 tamba la prienxe rekezitu atestadu mediku nian, viza mate (expire), sistema aviaun la simu.
Entretantu traballadór sira ne'ebé hetan kansela husi SEFÓPE hodi ba Australia ne'e asina kontratu hamutuk ho timoroan na'in 140 resin iha Salaun Delta Nova ba ona Australia iha dia 1 Dezembru. Maibé infelizmente timoroan na'in 15 ne'e labele ba tanba SEFÓPE troka kedas ho ema seluk no balun ba hasai fali husi Aviaun kuandu timoroan sira ne'e iha ona avian laran iha loron 2 Dezembru semana kotuk.(*)
