Tuir informasaun ne’ebé www.tempotimor.com asesu iha pajina espesial SEFOPE, Diretór Diresaun Nasionál Empregu Exteriór, Filomeno Soares, hateten, realizasaun programa PDB (Pre Departure Briefing) bazeia ba kritéria ne’ebé empregadór husi Australia fó, nune’e husu ba kandidatu sira ne’ebé hetan oportunidade atu aproveita hó didi’ak hodi aprende, tanbá faze ida ne’e sei lori ita ba hatene kultura, lei, no disiplina servisu iha Australia.
Dadaun problema boot iha Australia maka traballadór sira halai ses husi sistema, tanbá ne’e husu ba traballadór foun sira ne’ebé foin hetan oportunidade ba servisu labele halo tuir sira ne’ebé halai ona, tanbá halai ses husi sistema ita rasik sei taka dalan ba empregadór atu emprega tán joven Timor-oan sira ne’ebé hein hela oportunidade servisu.
Traballadór sir aba servisu iha Australia reprezenta nasaun no povu Timor-Leste no husik hela família, tanbá atu hadi’a moris, nune’e husu atu halo tuir komprimísiu ne’ebé ita boot sira halo, servisu kumpri lei ne’ebé nasaun ne’e iha, no servisu rai osan hodi fila mai bele hadi’a ekonomía família no nasaun.
Entretantu traballadór Timoroan na’in-66 ne’e, kompostu husi mane na’in-40 no feto na’in-26, ne’ebé sei ba servisu iha kompaña MC Cristal, ema na’in-10, Connect Oliveira Flower ema na’in-6 no Tasmania Berries ema na’in-50. (*)