Ministru Prezidénsia Konsellu Ministru Fidelis Leite Magalhaes afirma, Konsellu Ministru aprova projetu Dekretu-Lei kona-ba insentivu finanseiru estraordináriu ba Suku sira, ne’ebé aprezenta husi Ministru Administrasaun Estatál, Miguel Pereira da Carvalho.

Nia dehan, Inisiativa lejizlativa ida ne’e ho objetivu atu rekoñese no atribui ba Suku sira, ba sira-nia lideransa komunitária, no mós ba pesoál ne’ebé mak hala’o servisu iha suku sira, kompensasaun finanseira ida ba sira-nia aumentu ezesionál servisu nian iha preparasaun no implementasaun ba programa asisténsia governamentál sira, iha ámbitu nasionál, ne’ebé destina hodi minimiza agravamentu kondisaun finanseira nian ba agregadu familiár sira, liuliu programa “Subsídiu Uma-Kain”, ne’ebé remata ona, no programa “Sesta Bázika” ne’ebé daudaun ne’e iha faze ezekusaun hela.

"Ninia detallu ne'e depois diresaun jerál MAE (Ministeriu Administrasaun Estatal) nian halo kalkulu final no kontrolu ba ninia implementasaun, iha ninia montante jeral ne'e, xefe suku ida hetan $200 ba ninia kontribuisaun no ba sira seluk iha estrutura suku nian hetan $100", Fidelis hateten lia hirak ne’e hafóin reuniaun Konsellu Ministru iha palasiu governu, Kuarta (09/12).

Nia esplika, subsidiu ba xefe suku ho nia estrutura ne'e hanesan insentivu finanseiru ida, tanba bainhira implentasaun ba programa governu nian iha rekoperasaun ekonomika liu-liu iha inisiativu sesta bazika.

"Sesta bazika eziji xefe suku sira ho ninia estrutura servisu extra par bele implenta programa hirak ne'e, ida ne'e insentivu ba extra, la'os subsidiu gratuita ba xefe suku sira", nia dehan.

Kona-ba implementasaun insentivu finanseiru ba Xefe Suku sira ne'e, nia dehan, Ministeriu Administrasaun Estatal mak sei tau matan.

Iha fatin ketak, Ministru Administrasaun Estatál (MAE), Miguel Pereira da Carvalho infórma, lori ona proposta Dekretu-Lei ida hodi fó subsidiu extraordinariu ba xefe suku ho nia estrutura tomak.

"Subsidiu extraordinariu ba xefe suku no xefe aldeia, eh pesoal apoiu administrasaun suku sira ne'ebe fó apoiu ba governu sentral hodi halo registu ba benefisiariu sira husi sesta bazika no mos ba servisu ne'ebe sira halo rasik hodi distribui sesta bazika iha suku ho aldeia hotu iha Timor laran tomak", nia dehan tan.

Subsidiu ne'e fó, tanba durante ne'e administrasaun sentral sira utiliza xefe suku atu halo fatin distribuisaun.

"Entaun ho proposta Dekretu-Lei ida ne'e, halo pagaentu dala ida de'it ba xefe suku no aldeia sira ne'ebe fó apoiu masimu ba implementasaun sesta bazika iha Timor laran tomak ne'ebe hahu agustu to'o aprezenta data", nia salienta.

Bainhira proposta ne'e hetan promulgadu husi Prezidente Republika, kuantia orsamentu balun sei fó ba xefe suku no aldeia sira, montante ne'e promulgadu ona mak bele fó sai.

Nune'e, apoiu ne'ebé atu fó ba xefe suku no aldeia sira, eh estrutura tomak iha suku mak, hahú husi fulan agostu to'o dezembru 2020. (*)