Veteranu L7 hato'o lia hirak ne'e liga ho deklarasaun deputadu sira husi bankada opozisaun CNRT ne'ebé hasai liafuan defaktu iha kada intervensaun hodi dirije ba Primeiru Ministru Taur Mata Ruak ho ninia membru governu sira durante hala'o debate jeneralidade Orsamentu Jerál Estadu (OJE) 2021 iha Parlamentu Nasionál (PN).
Nia apela ba polítiku foun sira katak, bainhira asume knaar hanesan líder polítiku tenke respeita líder hirak ne'ebé sai hanesan patrimóniu estadu nian.
"Labele soran fali Xanana, Taur, Lere, Lú Olo ho Marí, no Ramos Horta, ema hirak ne'e património estadu, ita tenke respeita no tane aas sira," L7 hateten ba www.tempotimor.com iha PN Sábadu (05/12).
L7 deklara nia parte lakoi rona tan deputadu bankada CNRT atu hatete de faktu, maibé bainhira sira ko’alia tan ne'e signifika sira desfama Primeiru Ministru Taur Matan Ruak.
Molok ne'e, deputadu Cornélio Gama "L7" ameasa no fo ultimatu ba deputadu CNRT relasiona ho sira nia liafuan de faktu.
Ba kestaun ne'e, Vise Prezidente Bankada CNRT Patrocino Fernandes deklara, CNRT la konkorda ho ameasa ida ne'e no la merese atu hetan ameasa iha Uma fukun ida ne’e.
Tanba nia dehan, deputadu sira diretu atu ko’alia saida deit nu’udár direitu opozisaun nian, ne'e duni la merese kuandu deputadu ida maka mai ameasa fali deputadu ida seluk. (*)