Ministru Jeronimo hateten, eis jornalista RTTL na’in 33 ne'eb’e mak uluk hala'o servisu, agora sira ninia pozisaun muda tiha ona ba funsionáriu públiku.
"Ohin ha’u halo esplikasaun tanba iha jornalista sira ne'ebé uluk sei iha RTTL, hamutuk na’in 33 ne'ebé mak agora hola parte fali serbisu iha funsaun públika," Ministru Francisco hateten ba www.tempotimor.com iha PN, Sábadu (5/12).
Nia konsidera katak, tuir loloos problema ida ne'e problema ne'ebé akontese iha tempu liu ba, maibé tanba mosu fali preokupasaun iha PN, entaun MAPKOMS mós sei esforsu atu rezolve halo oinsa mak, servisu sira iha RTTL bele la'o ho diak.
"Maibe ami mós fó hatene ona katak, sei hare fila-fali, tanba ami foin estabelese diresaun rekursu umanu, ami sei hare fila fali halo avaliasaun nune'e bele rezolve problema rekursu umanu ne'ebé mak iha ministeriu ne'e rasik," nia haktuir.
Iha fatin hanesan deputada bankada Partidu Demokratiku (PD) Elvina Souza husu ba MAPKOMS atu halo esklaresimentu kona-ba direitu jornalista atus ida resin ne'ebé hala'o servisu iha Radio Televizaun Timor-Leste nian.
Nia esplika, agora daudaun atu ko’alia kona-ba jornalista sira nia direitu, entaun ministériu ne'ebé tutela presiza fó esklaresimentu ba sira nia estatutu prinsipál.
"Ha’u mós iha kestaun ida fali, kona-ba jornalista RTTL ne'ebé mak kuaze atus ida resin (100) ida ne'ebe halo servisu iha RTTL, sira nia estatutu halo nusa, tanba ita ko’alia kona-ba sira nia diretu, tanba ne'e presiza esklaresimentu kona-bá sira nia servisu ," nia levanta.(*)