Nia hateten, iha momentu komisaun A aprova relatóriu pareser ne'e deputadu bankada CNRT nain tolu mak la hola parte, no la envolve iha prosesu de elaborasaun, nune'e mós ba aprovasaun no apresiasaun ba relatóriu pareser komisaun nian kona-ba audiénsia publika orsamentu jeral estadu 2021.

Nia haktuir, relatóriu ne’e rasik bankada governu nian rasik mak halo no sira rasik mak aprova, no iha relatoriu pareser ne'e rasik mak hateten katak, lei orsamentu jeral do estadu ne'e, inkonstituisional.
Tanba ne'e, CNRT foti kedan pozisaun iha momentu tama aprovasun proposta OJE 2021 iha jeneralidade, katak CNRT sei la envolve iha prosesu toma desizun tomak iha OJE 2021.

"CNRT bainhira la marka prezensa iha plenaria, ne'e iha razaun fundamental balun labele marka prezensa iha ne'eba, Tanba, se bankada governu rasik hateten katak lei orsamentu jeral estadu ne'e mak inkonstituisional, tanba sa mak ami tenke ba partisipa hodi partilla fali ami nia hanoin iha prosesu ida atu debate buat ida inkonstituisional ne'e," Patrocino hateten ba www.tempotimor.com iha PN, Sabadu (5/12).

Nia haktuir, problema seluk ne'ebe CNRT preokupa ne'e maka orsamentu jeral estadu 2020 ne'ebe foin mak aprova liu ba kotuk.

Tuir CNRT nia hare katak, orsamentu ne'ebe bele dehan katak, boot, enbora dehan governu uza tiha ona balun iha periode de duodesimu, mais metade husi orsamentu ne'e maka atu ezekuta iha fulan rua nia laran, maibe bainhira governu mai aprezenta orsamentu 2021, relatoriu ezekusaun iha fulan rua nian ne'e governu la aprezenta.

"segundu, depois ami hare iha proposta lei orsamentu jeral estadu 2021 nian ne'ebé mai ne'e, kuandu ami hare katak, iha ona irregularidade balun, ne'ebé kontradis ho lei orsamentu jestaun finanseiru ninian," nia kestiona.

Iha introdusaun orsamentu jeral estadu, nia dehan, ida mai ho orsamentu por programa, loloos ida ne'e tenke adjusta ho lei orsamentu jestaun finanseiru, ba estrutura orsamentu jeral estadu ninian maibe ne'e la akontese.

Deputadu ne’e mós hato'o pozisaun politika CNRT nian, kuandu CNRT foti desizun tanba ida mos sira nafatin kestiona katak, oitavu governu viabilizadu ne'e laiha baze legal atu aprezenta orsamentu jeral estadu mai parlamentu nasional.

"tanba, rai la naben, orsamentu ida 2021 nian seidauk ezekuta tanba sa mak la ba ezekuta lai orsamentu 2020 nian, hodi lori ba hadia, hadia lai mak lori mai," nia kestiona tan.

Nia konsidera bankada governu mantein debate orsamentu ida ne'e tanba sira toman ona katak inskontituisional ne'e la problema Kontra lei ne'e la Problema, tanba sira intrese liu oinsa mak foti osan povu nian, tau bolsu, hodi gasta, goza, la'o, ida ne'e mak akontese.(*)