Xefe governu ne’e dehan, nasaun sira ne’ebé ukun-aan tinan barak ona, maibé dezenvolvimentu seidauk kompleta, ema balun sei hela iha ponte okos.
Taur ko’alia asuntu ne’e relasiona ho komemorasaun loron proklamasaun independensia bad ala 45 iha 28 Novembru tinan ne’e.
“Ita kontinua halo esforsu maka’as tanba dezenvolve ita-nia rai hodi halakon ki’ak no mukit, hadi’a sidadaun sira-nia moris, tanba prosesu ida ne’e la fasíl, kuandu ita haree esperiénsia nasaun seluk ne’ebé ukun-aan kleur ona, ezemplu Portugál ukun-aan besik tinan 900, maibé ema tuur iha ponte okos iha, depois Indonézia tinan 70 resin ona mais eletrisidade laiha ne’e, laiha duni,” PM Taur hateten lia hirka ne’e iha Palásiu Prezidensiál Bairru-pite, Kinta (26/11).
Xefe governu ne’e mós dehan, Timor-Leste foin ukun-aan tinan 18, maibé di’ak tanba iha progresu dezenvolvimentu nian barak mak iha ona, tanba ne’e kontinua esforsu hodi halo.
“Ita foin ukun-an, foin atu tama ba tinan 20, ita labele halo milagre, mais ha’u orgullu, tanba foin tinan 18, maibé iha avansu barak, parte ekonomia, demokrasia no dezenvolvimentu fíziku sira seluk, mezmu iha buat barak ne’ebé seidauk to’o ita hotu nia hakarak, maibé ne’e prosesu ida, jerasaun ba jerasaun sei kontinua, ita sira ne’e mate hotu mós Timor-Leste sei nafatin. Importante mak ki’ak labele iha ema tenke empregu, uma tenke di’ak, eskola, bee-moos tenke iha, eletrisidade labele mate. Buat sira ne’e sei ko’alia nafatin de’it, mezmu ita sira ne’e mate hotu ona,” Taur esplika.
Iha fatin seluk, Xefe Estadu Mariór Jenerál F-FDTL, Maijór Jenerál Lere Anan Timur hateten katak, dezenvolviemntu iha Timor-Leste kontinua la’o, mezmu la’o nei-neik.
“Dezenvolvimentu kontnua la’o mezmu la’o nei-neik, depois ita nasaun joven kompara ho nasaun seluk ne’ebé ukun-aan kleur ona, dalaruma ita di’ak liu oituan, entaun agora ne’e depende ba estabilidade, seguransa no polítika iha TL,” nia halo komparasaun.
Entretantu dezenvolvimentu kona-ba eletrisidade, hela suku 76 mak seidauk asesu, maibé suku 376 mak asesu ona.
Kona-ba estrada ne’ebé presiza halo reabilitasaun iha teritóriu nasionál liu kilómetru 300 inklui bee-moos ba komunidade sira ne’ebé governu instala ona 1.600 resin inklui iha planu atu estabelese tan projeitu ba bee-moos kuaze 60.(*)
Publisidade
