MAPKOMS organiza re-avalizasaun ne’e tanba ezekusaun ba OJE 2020 durante fulan-rua de’it no oras ne’e hela de’it ona loron 25 atu remata.
“Enkontru ohin ne'e, atu hare fila-fali ezekusaun orsamentu 2020. Fulan-rua, ne'ebé hela mak loron 25 ne'e, saida mak halo iha loron 25 ne'e liu-liu atu kompleta ezekusaun orsamentu ne’ebé maka 2021 ninian ne'ebé sei iha ba ami ninia ministériu”, informa Ministru Asuntu Parlamentár no Komunikasaun Sosiál, Francisco da Cosa Martins Pereira Jerónimo ba jornalísta sira, hafoin sorumutuk interna iha Palásiu Governu, Kuarta (11/11).
Nia hatutan, MAPKOMS nia prioridade maka, sei iha kontinuasaun hodi halo ezekusaun ba atividade ne'ebé planeia ona iha tinan 2020 nian, ikus liu atividade sira atu bele kompleta atividade sira RTTL nian iha 2021, ligadu liu ba atividade no programa sira diária nian, tanba haree ba bens no servisu.
Iha diresaun Centro Formação Técnica Comunicação (CEFTEC) nian maka, atu kompleta tan formasaun ba jornalísta sira iha lian Portugéz nomós iha relasaun ho atividade sira ne'ebé ofisiál média (media officer) sira iha.
Husi diresaun desiminasaun informasaun nian, atu kompleta tiha servisu sira ne'ebé iha relasaun ho programa “Naroman ba Suku”, Governu ko’alia, Mai ita hotu hare, ne'ebé atu kompleta tiha iha fulan dezembru tinan ida ne’e (2020).
“Sira ne'e hotu ami planeia hotu ona, atu nune'e bele kompleta iha dezembru. Ami nia tarjetu ne'e bele to'o pursentu 90 resin, tanba programa halo hotu ona, hein de'it ona ezekusaun”, nia hateten.(*)
PUBLISIDADE
