Primeiru Ministru (PM) Taur Matan Ruak hateten lia hirak ne’e, liuhusi komunikadu nu’udár mensajen ofisiál ba komemorasaun Masakre Santa Krus 12 novembru tinan ne’e.
Jenerál ne’e hateten, Ohin loron importante, loron ne’ebé iha tinan 29 ba kotuk, Juventude Loriku As’wain ho determinante no nakonu ho espíritu luta nian, hamriik hakilar ba mundu kona-ba kauza luta ba ukun rasik-an, no iha loron ne’e duni nakfila sai trajédia boot.
“Masakre Santa Krús, joven feto no mane barak mak raan nakfakar no balun lakon to’o agora. Ho grasa filmajem Max Stahl nian, ne’ebé konsege sai ba li’ur hodi loke mundu nia matan kona-ba trajédia nakukun ida ne’e, ne’ebé ikus mai mundu internasionál preokupadu kona-ba timoroan sira-nia sofrimentu hosi asaun brutalizmu hosi forsa okupante sira", komunikadu ne'ebé Tempotimor asesu iha Kinta (12/11).
Taur hatutan, hafoin restaurasaun independénsia 20 Maiu 2020, Governu deside data ida ne’e nu’udar Loron Nasionál Juventude, atu fó onra ba joven feto no mane sira ne’ebé masakradu iha loron refere.
"Loron ida ne’e mós nu’udar loron reflesaun, liuliu ba joven sira ne’ebé foin boot hafoin ukun-an, tuur ba hodi refleta “SAIDA MAK HA’U BELE FÓ BA HA’U NIA NASAUN!” nune’e bele hatutan joven uluk nia misaun ne’ebé hatudu ona, sira harii hela Nasaun RDTL ne’ebé ohin ita hotu goza", PM Taur haktuir.
Nune’e aproveita loron ne’e, PM Taur hakarak apela ba oan joven sira, katak, misaun joven nian mak oinsá prienxe ukun rasik an ida ne’e, através edukasaun, no buka inovasaun, tanba nasaun ne’e nia futuru iha joven nia liman, maibé ba ema sira ne’ebé matenek de’it, tanba mundu ohin loron kompetitivu maka’as, sé mak la aproveita tempu ne’e, nia sei hela iha kotuk.
"Ita-nia Nasaun foin hamriik tinan 18, Nasaun ho tinan 18, seidauk bele fó satisfasaun ba ema hotu-hotu, tanba ita-nia Estadu nia nesesidade barak tebes, enkuantu rekursu ne’ebé ita iha la sufisiente atu atende hotu iha tempu badak de’it. Haree hosi esperiénsia nasaun sira ne’ebé ukun an liu ita tinan barak, hanesan timoroan, ita bele orgullu tanba ita la’ós Nasaun ida ne’ebé di’ak liu iha mundu, maibé mós la’ós aat liu iha mundu", PM Taur hateten tan.
Hanesan Primeiru-Ministru, sei halo esforsu, kria kondisaun atu nasaun la’o ba oin, no roda ekonomia la’o nafatin hodi kontribui ba kriasaun kampu traballu ba sidadaun sira.
“Hanesan ha’u dehan beibeik, Governu ne’e lakohi husik timoroan ida hela iha kotuk, mas para ida ne’e, ha’u-nia oan joven sira-nia kontribuisaun importante ba estabilidade. Ikus liu ha’u dejeza ksolok loron nasionál juventude ba imi hotu", PM Taur nia dezezu. (*)
PUBLISIDADE
