Ministru Defeza no Seguransa (MDS) Filomeno da Paixão de Jesus hateten, husi diseminasaun ne'e atu forma hikas karáter funsionáriu MDS ninian no mos ba forsa sira.
"Semináriu ohin ne'e atu fanun fali forsa defeza no funsionáriu MDS nian, atu hadi'a sira-nia aan no karáter, tuir lei Médida Prevensaun no Kombate Korupsaun (MPKK), tanba tauk mak ita tarde tiha, atu hadi'a fali mós susar ona," Ministru Filomeno dehan ba jornalista sira iha Kuartel Jenerál Fatuhada-Dili, Kinta (5/11).
Nia mós afirma, katak, médida sira iha lei foun ne'e seidauk, maibé atualmente tribunál de kontas mak sei akompaña servisu dirijente instituisaun sira.
"Balun sira dehan kamaan, tanba ne'e husu atu hadi'a de'it, labele repete tan, maibé sira ne'ebé simu todan karik, sira bele haruka ba Komisaun Anti Korupsaun (KAK) no fatin seluk tan no ba iha Ministériu Públiku (MP) hodi halo julgamentu," nia dehan.
Molok ne'e iha Ministru nia diskursu dehan, korupsaun ne'e inimigu boot ida ba Timor-Leste, tanba ne'e, presiza hetan apoiu husi parte hotu-hotu.
“Atu evita korupsaun presiza kapasita mós rekursu umanu, tanba korupsaun la’ós afeita de’it ba servisu governu nian, maibé afeita mós ba dezenvolvimentu ekonomia no moris di’ak povu sira iha nasaun ne’e,” katak Nia
Iha fatin hanesan Komisáriu KAK Sergio Hornai hateten, semináriu ohin nian, oinsa mak haree kona-ba kombate krime korupsaun, relasiona ho lei númeru 7/2020 nomós oinsa hametin governasaun di'ak iha Timor-Leste.
"Ligasaun ba lei foun ne'e mak ko'alia kona-ba kombate krime korupsaun iha TL ne'ebé mak abranjidu, hahú husi instituisaun estadu ninian, seitór privadu sira ni sosiedade hotu-hotu," Sergio dehan.
Nia hatutan, alende husi pontu dahuluk kona-ba kombate korupsaun, lei foun ne'e ezije mós kona-ba deklarasaun riku-soin.
"Lei nia nia ezijénsia mós kuandu to'o ona loron 180 ne'e ita atu implementa kona-ba deklarasaun de bens (sasan) rendimentu no interese sira, ne'ebé husi instituisaun polítiku no méritu hanesan diretór jerál, diretór nasionál, xefe departamentu nomós ema sira ne'ebé mak servisu iha migrasaun, karantina, servisu aduañeiru nian, sira sei presta deklarasaun ba autoriedade kompetente," katak Hornai.
Komisáriu mós afirma, ba sidadaun sira ne'ebé lakohi deklara nia bens no rendimentu mak iha sansaun ne'ebé bele aplika ba sira.
"Iha ne'ebá ninia konsekuénsia administrativa, represivu ne'ebé halai liu ba penalidade, entaun ema ne'ebé mak sujeita ona tuir lei ida agora iha artigu 29 to'o 30, katak ema ne'ebé ezerse hela servisu hanesan diretór, ministru, deputadu, komisáriu, mak la halo deklarasaun, lei sei notifika nia, para nia justifika, tansa saida mak nia la halo deklarasaun," nia tenik.
La'ós ne'e de'it, maibé lei mós fó prazu loron 90 hodi pesoál refere halo deklarasaun, maibé laiha natain mak sei aplika médida koima ba pesoál refere.
"Se la halo nafatin mak kontinua aplika médida koima, maibé lakohi nafatin maka sei médida represivu tuir artigu 244 husi kódigu penál, katak la koopera, la presta deklarasaun informasaun kompleitu ba autoriedade kompetente," katak Nia.
Entretantu, KAK rasik mós harii ona Planu Esratejiku Komisaun Anti Korrupsaun (PECAC) tinan 2021-2025 ne’ebé sei sosializa ba ministériu no liña instituisaun estadu, setór privadu no públiku.
Inisitiva harii PECAC atu orienta no haraik responsabilidade boot ba iha (Espesialista Anti-Korrupsaun) sira atu halo akonselamentu ba iha instituisaun estadu no povu Timor tomak iha luta sagradu prevene no kombate korrupsaun.
PECAC 2021-2025 ne’e sei formula husi Komisariu Adjuntu ba Asuntu Servisu Apoiu no Kooperasaun, Alexandre Freitas ho Asesór Augosto Fatima nu’udar diretór no giaun ida atu orienta manuain komisaun nian hodi halo servisu prevensaun no investigasaun kriminalidade nian.
PECAC sei ajuda Estadu no Timoroan sira bele alkansa objetivu komun no abstratu hodi halo alienasaun ba iha objetivu estadu ninian, Timor livre husi pratika krimi korrupsaun. PECAC sei garante no asegura direitu fundamental sidadaun ninian ba iha asesu justisa.
